КДБ узбройваецца для сачэння за апазіцыяй?

Мінулым тыднем Менск наведаў гандлёвы прадстаўнік ангельскай кампаніі Sepura, які прэзентаваў беларускім спецслужбам і Міністэрству абароны спецсродкі для схаванага вонкавага назірання за аб'ектамі.

На сустрэчы з адмыслоўцам з Sepura прысутнічалі некалькі вайсковых афіцэраў у форме, супрацоўнікі МУС і КДБ. Асноўны ўпор на прэзентацыі быў зроблены менавіта на вайсковае ўжыванне прапанаваных радыёстанцыяў, па-сучаснаму - радыётэрміналаў, піша «Ежедневник».

Прадукцыя кампаніі Sepura у свеце вядома акурат сваім нецывільным выкарыстаннем. Так, падчас вайны ў Іраку скандальнае адценне меў продаж некалькіх дзясяткаў тысяч тэрміналаў у раён узброенага канфлікту.

Асабліва шмат часу на менскай прэзентацыі было адведзена на тэрміналы для службаў схаванага назірання, якія могуць маскавацца пад адзеннем ці ў кішэні, калі ўрадавыя агенты сочаць за пэўным чалавекам. Зразумела, такія тэрміналы зроблены па апошнім слове тэхнікі, маюць высокі ўзровень шыфравання голасу і кіруюцца схаваным маніпулятарам. Для таго, каб прыбор нельга было выявіць пры знаходжанні побач з аб'ектам назірання, ён не мае дысплеяў, а сігналы выкліку аператыўнага агента падаюцца ў выглядзе замаскаваных вулічных шумоў.

Для захавання высокага ўзроўня сакрэтнасці пры назіранні за людзьмі ангельская кампанія прапанавала беларускім замоўцам найшырэйшы выбар адмысловага маскавальнага адзення і аксэсуараў для назірання, уключаючы камізэлькі розных колераў, устаўкі ў штаны, станікі, брошкі і заплечнікі.

Дакладчык запэўніў, што поўны каталог адмысловага адзення для сачэння з апісаннем тавараў на любы густ, які налічвае 300 старонак, будзе перададзены зацікаўленым беларускім спажыўцам. Вельмі рэкамендаваліся гарнітуры схаванага нашэння, калі слухаўка хаваецца настолькі глыбока ў вуха, што без адмысловага абсталявання яго не выцягнуць.

Па словах супрацоўніка Sepura, кампанія ўжо прадавала сваю тэхніку ў МУС і ФСБ Расеі, а ў Вялікабрытаніі шматлікія радыётэрміналы афіцыйна прыняты ва ўзбраенне адной з наймагутных выведных службаў свету. Цяпер кампанія мае цвёрды намер пачаць продажы ў Беларусі.

"Е" зафіксаваў, што пасля прэзентацыі пачаліся перамовы з адным з беларускіх замоўцаў, якія праходзілі не адну гадзіну.