Новы ўказ Лукашэнкі: цяпер будуць саджаць за канцэрты?
39- 21.05.2008, 8:25
Канцэрты і гастролі ў Беларусі цяпер рэгулююцца ўказам Аляксандра Лукашэнкі. Указ уводзіць адміністрацыйную адказнасць за правядзенне несанкцыянаваных канцэртаў.
Гэты дакумент таксама прадугледжвае стварэнне мастацка-экспертных камісій, якія будуць знаёміцца з матэрыяламі праграмы канцэртаў ды папярэдне праслухоўваць выступы музыкаў.
Згодна з указам Аляксандра Лукашэнкі, камісія будзе “даваць заключэнне аб адпаведнасці мерапрыемства асноўным задачам рэгулявання гастрольна-канцэртнай дзейнасці на тэрыторыі Беларусі”. Дагэтуль афіцыйна такіх камісій не існавала. Але ў практыцы канцэртных менэджэраў былі выпадкі, калі іх прасілі прадаставіць запіс таго ці іншага гурта. Менэджэр гурта “Серебряная свадьба” і арганізатар канцэтаў многіх іншых гуртоў Аляксандр Багданаў кажа, што да гэтага часу ў яго атрымлівалася перахітрыць чыноўнікаў.
- Калі да “Серебряной свадьбы” чыноўнікі Мінгарвыканкама ставяцца добра, то розныя псіхадэлічныя гурты - кшталту “Сонцецветы” - ім не падабаюцца. Таму часам прыходзіцца крыху хлусіць і прыносіць, напрыклад, першы альбом Red Hot Chili Peppers. Яны слухаюць і кажуць: “О, рок-н-рол! Ладна, праводзьце канцэрт”, -- паведаміў Багданаў “Радыё Рацыя”.
Шмат хто памятае леташнюю гісторыю з забаронай канцэрта гурта “Крама”. Тады чыноўнікі Мінгарвыканкама пастанавілі: калектыў мае нізкі мастацкі ўзровень. Узгадвае арганізатар таго канцэрту Павел Кашырын:
- Ва ўпраўленне культуры Мінгарвыканкама я хадзіў ледзь не як на працу. Усе ведаюць, што нічога з гэтым мы не змаглі зрабіць. У суд таксама вырашылі не падаваць.
Пасля восеньскага наведвання некаторымі беларускімі музыкамі кіраўніка ўпраўлення ідэалогіі Адміністрацыі прэзідэнта сітуацыя з канцэртамі істотным чынам змянілася. Гурты “Крама”, N.R.M., Neuro Dubel правялі паспяховыя выступы ў сталічных ды рэгіянальных клубах. Зараз з турам па гарадах Беларусі ездзіць гурт “Крамбамбуля”. Арганізуе гэтыя канцэрты агенцыя “Лінія гуку”. Яе дырэктар Уладзімір Шаблінскі распавёў, што на супрацоўніцтва з гуртом Лявона Вольскага ідуць нават дзяржаўныя ўстановы.
Цалкам верагодна, што цяпер праблемы з арганізацыяй канцэртаў беларускіх гуртоў пачнуць узнікаць ізноў. Стварэнне мастацка-экспертных камісій - гэта чарговая спроба кантролю над музыкамі, кажа музычны журналіст Зміцер Падбярэзскі.
- Нельга выключаць адсейвання няўгодных выканаўцаў не зважаючы на ўзровень іх творчасці. Гэта яшчэ адзін крок у бок вяртання ў добрыя савецкія часы, -- лічыць журналіст.
І яшчэ адзін істотны пункт указа прэзідэнта пра рэгуляванне гастрольна-канцэртнай дзейнасці. За арганізацыю несанкцыянаваных канцэртаў цяпер уводзіцца адміністрацыйная адказнасць. Нядаўна ў Гродне на тэрыторыі Генеральнага консульства Польшчы непрызнаваны беларускімі ўладамі “Саюз палякаў на Беларусі” правёў канцэрт вядомага польскага гурта Lombard. Выглядае на тое, што болей такіх канцэртаў праводзіцца не будзе.