Лётаць праз Маскву стане даражэй
10:28, — Грамадства
Расейскія эксперты паліўнага рынка прагназуюць, што падвышэнне коштаў на авіяцыйную газу можа пацягнуць рост коштаў авіябілетаў у летні сезон гэтага года.
Як нагадвае Інтэрфакс, за сакавік-красавік кошт газы вырас на 20%, з леташняй восені - на 70%.
Па адзнаках экспертаў, разам з падвышэннем коштаў на авіябілеты будзе назірацца скарачэнне аб'ёмаў перавозак.
Авіякампаніі, якія базуюцца ў Маскве, атрымалі афіцыйныя паведамленні ад адміністрацыяў палівазапраўных комплексаў маскоўскага авіяцыйнага вузла пра падвышэнне коштаў на паліва з 1 траўня на 12,3%.
У красавіку адпускны кошт газы ў аэрапорце "Дамадзедава" складаў 23,4 тыс. рас. руб. за 1 тону. Разам з коштам паслуг па запраўцы (830 рас. руб. за 1 тону) і ПДВ авіякампаніі з 4 траўня ўжо плацяць за 1 тону газы больш за 32,1 тыс. рас. руб. Гэта вымушае авіякампаніі павялічваць памер паліўнага збору ў канчатковым кошце квіткоў.
Прадаўцы авіяпаліва сцвярджаюць, што падвышэнне адбылося ў выніку павелічэння гуртовых коштаў на прадукцыю нафтаперапрацоўчых заводаў, належных нафтавым кампаніям.
Авіяперавозцы таксама прадказваюць скарачэнне аб'ёмаў перавозак пасажыраў. У авіякампаній практычна няма рэсурсаў на скарачэнне выдаткаў. Эксперты лічаць, што авіяперавозцы, якія не маюць паліваэфэктыўных самалётаў, будуць скарачаць колькасць рэйсаў ці адмяняць цэлыя маршруты.
