З універсітэту адлічылі пераможцу нацыянальнай алімпіяды
- 10.07.2008, 10:51
Актывіст «Маладога Фронту» Алесь Круткін, студэнт 1-га курсу гістарычнага факультэта БДУ, па вяртаньні з-за мяжы даведаўся, што ён выключаны з унівэрсітэта.
Падставай для выключэньня маладафронтаўца стала быццам бы парушэньне ўнутранага распарадку ўнівэрсітэта, што выяўлялася ў шматлікіх затрыманьнях і неаднаразовай адміністрацыйнай адказнасьці Алеся, паведамляе прэс-служба МФ.
За актыўную палітычную дзейнасьць Алесь Круткін двойчы атрымліваў строгія вымовы ад адміністрацыі, і яму нават было прапанавана перавесьціся на завочнае навучаньне, ад чаго маладафронтавец адмовіўся.
Адзначым, што Алесь зьяўляецца пераможцам нацыянальнай алімпіяды па гісторыі Беларусі і ва ўнівэрсітэт юнак быў прыняты без уступных іспытаў. На сваём курсе Алесь Круткін лічыцца лепшым вучнем.
