Міліцыянер адкрыў стральбу пры трохгадовым дзіцяці
22- 15.07.2008, 17:35
Участковы інспектар міліцыі Бярозоўскага РАЎС Брэсцкай вобласці адкрыў стральбу з табельнага пісталета сістэмы Макарава ў прысутнасці трохгадовага дзіцяці. Міліцыянт 5 разоў страляў у паветра нібыта для абароны сябраў камісіі па справах непаўнагадовых, якія заявіліся, каб адабраць дзіця ў нядбайных бацькоў.
«Пяць стрэлаў у паветра зрабіў участковы інспектар міліцыі, калі сябры камісіі па справах непаўнагадовых прыйшлі забраць 3-гадовае дзіця ў нядбайных бацькоў», - паведамляе «Інтэрфакс» са спасылкай на ЎЎС Брэсцкай вобласці.
«П'яныя бацькі дзіцяці сталі пагражаць сякерай і нажом сябрам камісіі, якія прыйшлі забраць дзіця. Супрацоўнік міліцыі ў мэтах спынення супрацьпраўных дзеянняў зрабіў 5 папераджальных стрэлаў з табельнай зброі», - растлумачылі ва ЎЎС.
«Пасля гэтага нядбайныя бацькі спынілі супрацьпраўныя дзеянні і былі затрыманыя. У іх адабраныя сякера і нож, складзеныя адміністрацыйныя пратаколы, дзіця змешчанае ў дзіцячы сацыяльны прытулак, праверку праводзіць пракуратура», - паведамілі ва ЎЎС.
Заняцца псіхалагічным станам дзіцяці, якога пад стральбу з пісталета пазбаўлялі нядбайных бацькоў, падобна, ніхто не знайшоў часу, адзначае АФН.
Ці меркавала намглавы адміністрацыі Наталля Пяткевіч, асноўны распрацоўшчык сумна вядомага дэкрэту, які дазваляе ў парушэнне Канстытуцыі ў пазасудовым парадку забіраць дзяцей у бацькоў, што шчаслівая і бесклапотная будучыня беларускіх дзяцей у дзіцячым доме або прытулку будзе ажыццяўляцца пад стральбу з табельнай зброі?
Няўжо сапраўды перад выканаўцамі стаіць задача любым коштам адабраць дзіця ў бацькоў-алкаголікаў? Калі гэта сапраўды так, то да якіх наступстваў гэта можа прывесці?