У дзень «выбараў» пройдзе акцыя пратэсту каля консульства Беларусі ў Эстоніі
2- 25.09.2008, 12:38
Беларускія студэнты, якія вучацца ў ВНУ Эстоніі па праграме эстонскага ўрада, плануюць 28 верасня правесці акцыю пратэсту «супраць існуючага ў Беларусі дыктатарскага рэжыму» і «супраць працэсу імітацыі «парламенцкіх выбараў».
«Мы супраць нахабнага здзеку з дэмакратычных еўрапейскіх каштоўнасцяў, які адбываецца ў трэцім тысячагоддзі ў геаграфічным цэнтры Еўропы, у трохстах кіламетрах ад мяжы Эстонскай рэспублікі», — гаворыцца ў звароце студэнтаў.
Актывісты збіраюцца наведаць 28 верасня генеральнае консульства Беларусі ў Таліне, паведамляе інфармацыйны партал DELFI.
«Мы плануем атрымаць у выбарчай камісіі бюлетэні для галасавання, але ў знак пратэсту не апускаць іх у выбарчую скрыню, а дэманстратыўна знесці іх з сабой», - кажуць студэнты.
«Гэтай акцыяй мы хочам прыцягнуць увагу грамадскасці Эстоніі, данесці інфармацыю аб сітуацыі ў Беларусі, распавесці аб злачынствах рэжыму супраць правоў чалавека ў нашай краіне», - сцвярджаюць яны.
