Польшча патрабуе тлумачэнняў ад беларускага Міністэрства адукацыі

Польская амбасада мае намер звярнуцца да беларускіх уладаў для растлумачэння заяваў Мінадукацыі аб навучальных установах для нацыянальных меншасцяў.

Як нагадвае газета «Наша Ніва», 22 кастрычніка інфармацыйныя агенцтвы распаўсюдзілі фрагменты гутаркі з намеснікам міністра адукацыі Аляксандрам Жуком, у якіх ён заявіў, што «Беларусь не будзе ствараць спецыяльных школаў для нацыянальных меншасцяў», і што «агульнае выкладанне ўсіх прадметаў у сістэме адукацыі Беларусі будзе весціся толькі на дзяржаўных мовах краіны».

Па словах першага сакратара дыпламатычнага прадстаўніцтва Польшчы ў Беларусі Паўла Марчука, амбасада звернецца да беларускіх уладаў, каб даведацца, што менавіта азначаюць словы Жука.

«У нас няма поўнага тэксту інтэрв'ю, фрагменты выказванняў вядомыя толькі з некаторых інфармацыйных агенцтваў. Хочам даведацца, што канкрэтна хацеў сказаць першы намеснік міністра адукацыі Беларусі», -- адзначыў П. Марчук.