Лукашэнка: «Кансультатыўны савет – гэта не парламенцкая трыбуна, каб прапіхваць брудныя ідэі»
22- 10.02.2009, 15:59
Аляксандр Лукашэнка заявіў, што чальцы створанага Грамадска-кансультатыўнага савета, у якім удзельнічае апазіцыя, павінны выпрацоўваць дзелавыя прапановы, а не прапіхваць «брудныя ідэі».
«Добра, хай будзе гэты савет. Прыходзьце, кажыце, уносьце прапановы. Але калі хтосьці думае, што гэта будзе парламенцкая трыбуна, каб гвалтам крычаць і прапіхваць брудныя ідэі, дык гэтага не будзе», - заявіў А.Лукашэнка журналістам у Лідзе (Гарадзенская вобласць).
Паводле яго словаў, павінна быць «толькі дзелавая размова і дзелавы савет». «Калі крытыкуеце, дык кажаце па сутнасці», - прапанаваў кіраўнік дзяржавы.
Каментуючы вынікі першага паседжання Грамадска-кансультатыўнага савета, А.Лукашэнка спытаў: «Што вялікага, новага вам сказала апазіцыя? Для мяне – нічога».
Нагадаем, што пры адміністрацыі Лукашэнкі ў апошні час было створана некалькі дэкаратыўных «саветаў» з удзелам розных экспертаў для дэманстрацыі так званай «лібералізацыі».
