«Ляпісаў» прызналі лепшымі ва Украіне
1- 6.04.2009, 13:51
Група «Ляпіс Трубяцкі» атрымала ўзнагароду «Альбом года» за альбом «Маніфест», які выйшаў увосень, на ўкраінскім узнагароджанні «Непапса».
Як адзначаеTUT.by, заснавальнікам узнагароджання, якое спецыялізуецца ў галіне рок-музыкі, з'яўляецца папулярнае ўкраінскае радыё «Джэм FM». Само мерапрыемства праходзіла ў Кіеве, было закрытым і таму вельмі цёплым. Сярод пераможцаў узнагароджання, зразумела, дамінавалі ўкраінцы – «Воплі Відаплясава», «Бумбокс», «Esthetic Education» і інш. Тым больш важкая перамога «Ляпісаў», прычым у адной з галоўных намінацыяў.
Нагадаем, што сёлета група «Ляпіс Трубяцкі» ужо перамагла ў намінацыях «Гурт года» і «Рок» на ўзнагароджанні «Гукавая дарожка» (Расея), у намінацыі «Кліп года» на ўзнагароджанні «Чортавы тузін» (Расея), у намінацыях «Лепшы рок-альбом» і «Прыз вялікага журы» на ўзнагароджанні «Experty.by» (Беларусь), у намінацыях «Гурт года», «Альбом года», «Песня года» на ўзнагароджанні «Рок-каранацыя» (Беларусь).