Ярмошына: «Не будзе ніякіх навэлаў, якія б змянялі выбарчую сістэму»
30
13:22, — Палітыка
Невыязная кіраўнічка ЦВК Беларусі заяўляе, што выбарчая сістэма краіны не будзе кардынальна перагледжаная.
Прапановы па змене выбарчага заканадаўства Беларусі, якія не прадугледжваюць кардынальнага перагляду выбарчай сістэмы, падрыхтаваныя працоўнай групай сумесна з экспертамі АБСЕ, паведаміла Лідзія Ярмошына ў інтэрв'ю агенцтву «Інтэрфакс».
«Падчас абмеркавання рэкамендацыяў, якія высунула АБСЕ па выніках парламенцкіх выбараў, экспертамі быў падрыхтаваны кампрамісны варыянт прапановаў па змене выбарчага заканадаўства. Падрыхтаваныя менавіта прапановы, а не законапраект», - заявіла кіраўнічка ЦВК.
Паводле яе словаў, у падрыхтаваным працоўнай групай экспертаў варыянце «няма наогул ніякіх навэлаў, якія б змянялі выбарчую сістэму Беларусі». «Проста змяняюцца некаторыя выбарчыя тэхналогіі, арганізацыйныя пытанні», - сказала яна.
Кіраўнічка ЦВК паведаміла, што, у прыватнасці, гэтыя прапановы датычаць «пытанняў вядзення перадвыбарчай агітацыі, спрашчэння парадку правядзення перадвыбарчых вулічных мерапрыемстваў, фінансавых пытанняў». «Там, напрыклад, разглядаецца пытанне стварэння індывідуальных фінансавых фондаў для кожнага кандыдата», - адзначыла Л.Ярмошына.
«Гэтыя прапановы накіраваныя на разгляд міністэрстваў і ведамстваў Беларусі для выпрацоўкі адзінай пазіцыі. На гэтай стадыі сёння гэты працэс і знаходзіцца», - сказала старшыня ЦВК. Таму, паводле яе словаў, «казаць пра нейкую таемную распрацоўку законапраекта нельга». Л.Ярмошына патлумачыла, што «законапраект можа быць падрыхтаваны толькі ў тым выпадку, калі будзе атрыманае адпаведнае даручэнне ад суб'ектаў заканадаўчай ініцыятывы. Такога даручэння пакуль няма», - заявіла старшыня ЦВК Беларусі.
Нагадаем, што ўсе выбарчыя кампаніі, якія прайшлі ў Беларусі пры рэжыме Аляксандра Лукашэнкі, былі прызнаныя міжнароднай супольнасцю несвабоднымі і несправядлівымі. Кіраўнічцы Цэнтрвыбаркама Беларусі Лідзіі Ярмошынай за фальсіфікацыю вынікаў выбараў забаронены ўезд у краіны Еўразвяза і ЗША.
Напісаць каментар (30)
Навіны
па тэме
- Ярмошына: Асноўны недахоп нашых «выбараў» — адсутнасць іх прызнання
- Ярмошынай не спадабаўся выніковы даклад БДІПЧ АБСЕ па «парламенцкіх выбарах»
Закладкі
