Іван Шыла здаў іспыт па ангельскай мове на 9 балаў

Гвалтам забраны ў войска актывіст «Маладога Фронту» здаў апошні іспыт, які быў яму неабходны для атрымання атэстата аб сярэдняй адукацыі.

Іван Шыла здаў іспыт на 9 балаў, паведамляе газета «Наша Ніва».

Летась Шылу па палітычных матывах выключылі з салігорскай сярэдняй школы №4 за адзін дзень да апошняга іспыту. У знак пратэсту са школы звольнілася дырэктар Вольга Сянькова. Праз паўгады моладзевага актывіста гвалтоўна забралі ў войска.

Таксама ў войска былі гвалтоўна забраныя і іншыя моладзевыя актывісты.

28 студзеня менскага актывіста «Маладога Фронту» Зміцера Хведарука, які з'яўляецца студэнтам Біблейскага каледжа, затрымалі дома і ў кайданках адвезлі ў ваенкамат.

Прыблізна ў той жа час гвалтоўна, у кайданках быў адпраўлены на вайсковую службу і кіраўнік «Моладзі БНФ» Франак Вячорка.

Таксама гвалтоўна былі забраныя моладзевыя актывісты Ігар Салавей, Юрый Дзяшук, Алесь Каліта, Зміцер Жалезнічэнка і шматлікія іншыя.