Вярхоўная Рада Украіны адправіла ў адстаўку кіраўніка МУС

Юрыя Луцэнку вінавацяць у неаднаразовым парушэнні заканадаўства Украіны.

За адстаўку кіраўніка МУС Украіны, якую ініцыявала Партыя рэгіёнаў, прагаласавалі на пазачарговым паседжанні ў чацвер 231 дэпутат, паведамляе «Корреспондент.net».

У праекце пастановы прычына звальнення Луцэнкі не называлася.

У той жа час у тлумачальнай запісцы да дакумента адзначаецца, што неабходнасць разгляду пытання аб звальненні Луцэнкі з пасады міністра ўнутраных спраў выкліканая сістэматычным парушэннем ім дзеючага заканадаўства Украіны аб выбарах, неаднаразовымі спробамі ўмяшальніцтва ў хаду выбарчага працэсу падчас правядзення выбараў прэзідэнта Украіны ў 2010 г., насуперак вызначаным заканадаўствам забаронам.

Сам Луцэнка ўчора заявіў, што ПР ініцыюе яго адстаўку ў сувязі з выбарчай сітуацыяй і сваім магчымым пройгрышам. «Рэч у тым, што Партыя рэгіёнаў упершыню праводзіць выбары без кішэннага міністра ўнутраных спраў. Вядома, іх гэта вельмі турбуе, бо ніякіх бачных фальсіфікацый у першым туры ім арганізаваць не ўдалося, нягледзячы на ўсе намаганні», - сказаў Луцэнка журналістам у Кабінеце міністраў. «Ці хопіць ім галасоў - гэта іх праблемы, а не мае. Я адчуваю, што я працую», - адзначыў міністр напярэдадні сваёй адстаўкі.

Луцэнка быў прызначаны міністрам унутраных спраў у лютым 2005 года. Займаў гэты пост з 2005 года па цяперашні час пры ўсіх прэм'ер-міністрах: Юліі Цімашэнка, Юрыі Еханураве, Віктары Януковічы.

За час працы Луцэнкі на пасадзе кіраўніка МУС было зроблена некалькі спробаў зняць яго з пасады, але ўсе яны былі безвыніковыя.