Датэрміновае галасаванне - строем
40- 15.12.2010, 12:04
У першы дзень датэрміновага галасавання ў Полацку выяўленыя факты ціску на выбаршчыкаў.
Так, да некалькіх індывідуальных прадпрымальнікаў яшчэ загадзя прыходзілі людзі з падатковай інспекцыі і настойліва рэкамендавалі ім прагаласаваць датэрмінова. У выпадку адмовы ад датэрміновага галасавання празрыста папярэджвалі пра магчымасць хуткіх праверак, паведамляюць «Праваабаронцы за свабодныя выбары».
Датэрмінова ў першы ж дзень прагаласавалі і вайскоўцы з часткі 49510. Яны прыйшлі галасаваць пад кіраўніцтвам намесніка камандзіра па ідэалагічнай працы.
У бюджэтных установах адміністрацыя павінна штодня справаздачыцца пра тое, колькі працаўнікоў ужо прагаласавалі. Пры гэтым настойлівыя рэкамендацыі ісці на датэрміновае галасаванне спалучаюцца з пажаданнямі добра падумаць над выбарам і зрабіць яго з усёй адказнасцю.
А працаўнікоў Полацкага ваенкамата ў аўторак на гадзіну раней адправілі з працы, зразумела, з умовай, што яны сёння ж прагаласуюць.