У Дзень роднай мовы беларускую дыктоўку пісалі амбасадары (Фота)
6- 21.02.2010, 16:23
У Міжнародны дзень роднай мовы ў Менску, у Чырвоным касьцёле прайшла трэцяя агульнанацыянальная беларуская дыктоўка.
Акцыя была прымеркаваная таксама да 20-годзьдзя прыняцьця ў Беларусі Закону аб мовах.
Урывак з твору Ўладзімера Караткевіча «Зямля пад белымі крыламі» пад дыктоўку пісалі болей як 50 чалавек, у тым ліку амбасадары Ўкраіны і Швэцыі Ігар Ліхавы і Стэфан Эрыксан.
Адкрываючы акцыю, старшыня «Таварыства беларускай мовы імя Францішка Скарыны» (ТБМ) Алег Трусаў адзначыў, што дыктант праводзіцца ў многіх населеных пунктах розных краін. Напрыклад, летась яго пісалі ў Італіі і на шведскім востраве Готланд, у Варшаве і Празе, у Аўстраліі, Канадзе і ЗША. Сёлета 12 лютага дыктант праводзіўся ў Мінску, а 20 лютага — у горадзе Бярозаўка Лідскага раёна Гродзенскай вобласці.
Чарговыя этапы дыктоўкі пройдуць 15 і 25 сакавіка ў Менскай штаб-кватэры БНФ. Яны будуць прысьвечаныя прыняцьцю першай Канстытуцыі РБ (15 сакавіка 1994 году), паводле якой беларуская мова атрымала статус адзінай дзяржаўнай, а таксама 92-й гадавіне заснаваньня БНР, якая ўпершыню абвясьціла беларускую мову дзяржаўнай.
Амбасадар Швэцыі Стэфан Эрыксан
Амбасадар Украіны Ігар Ліхавы