Турыст з Лондану прыехаў у Беларусь на 10 дзён, але ўцёк праз тры!
157
11:40, — Грамадства
Брытанец прасадзіў у беларускай сталіцы 500 даляраў за тры дні і спытаўся: «Як вы выжываеце ў месяц на 300?!»
Гэтую гісторыю, якая здарылася некалькі дзён таму, распавёў «Еўрарадыё» супрацоўнік адной з найбуйнейшых менскіх турфірмаў.
«Звярнуўся да нас турыст з Лондана, захацеў 10 дзён пабыць у Беларусі. Загадзя адмовіўся ад перакладчыка — сказаў, што ўжо быў у Малдове, Расеі, Украіне, праблемаў з мовай не ўзнікала. Ён прыехаў, а праз тры дні прыйшоў да нас і сказаў: «Хачу дадому! Дайце квіток на бліжэйшы рэйс дадому!» Мы сталі распытваць, што здарылася. Кажа: «Знаходзіцца тут больш не магу! Не магу чытаць па-расейску, а ніводнай лацінскай літары я не пабачыў. Такога нідзе няма! У вас дорага! Таксі даражэй, чым у Лондане, кавярні даражэй, пайсці ў клуб даражэй, транспарт даражэй! Я за тры дні прасадзіў 500 даляраў!» І ўрэшце рэшт ён запытаўся: «Як вы выжываеце тут на 300 у месяц?!», - распавялі ў турфірме.
Супрацоўнік турфірмы кажа, што сітуацыю з брытанцам яны вырашылі, але асадак, як кажуць, застаўся:
«Квіток мы яму знайшлі, адправілі яго. Але горкае пачуццё засталося… У яго прагучала добрае параўнанне нашай краіны з прыгожай жонкай: калі у цябе прыгожая жонка, але няма з ёй агульнай мовы — дык можаш толькі любавацца ёю… Маўляў, усё добра, людзі добрыя, наўкол прыгожа, чыста. Але няма базавых рэчаў, на якіх можна пабудаваць узаемаадносіны ў краіне».
Колькі ж у сярэднім аддасць замежнік за тыдзень у Беларусі?
«Калі гэта будзе гатэль тры зоркі эканом-класа, са сняданкам плюс візавая падтрымка — гэта 600-650 даляраў за тыдзень. Калі патрэбны трансфер з аэрапорта і назад — гэта будзе 750 даляраў за тыдзень», - кажа супрацоўнік турфірмы.
Пры гэтым, не забудземся дадаць яшчэ і кошт беларускай візы, якая зусім не танная!
«Сярэднееўрапейская — 60 еўра, пры атрыманні ў консульстве Рэспублікі Беларусь. Для брытанцаў яна вышэйшая — здаецца, 120 ці 130 еўра», - сказалі ў турфірме.
Ці шмат турыстаў імкнецца у Беларусь з такімі драконаўскімі ўмовамі? Як паказваюць звесткі Нацыянальнага статыстычнага камітэта, за 2009 год нашую краіну арганізавана наведала 95,5 тысячаў замежнікаў. З іх — 59,9 тысячаў з краінаў СНД. Сярэдняя працягласць знаходжання турыста ў Беларусі — 5 дзён. У гэтым годзе вынікі яшчэ лепшыя — за паўгода, паводле Міністэрства спорту і турызму, колькасць турыстаў павялічылася на 20,9% у параўнанні з гэткім жа перыядам 2009 года.
Аднак супрацоўнікі турфірмаў падаюць іншыя звесткі. Менеджэрка буйной сталічнай турфірмы кажа, што замежнікаў сёлета значна менш, чым раней.
«На жаль, у гэтым годзе менш, чым у мінулым. Асноўным чынам вінаватае павелічэнне консульскіх збораў у аэрапорце. У гэтым годзе візы ў аэрапорце ў нас атрымлівала на 80% чалавек менш, чым у мінулым. Росту няма, ёсць нават зніжэнне турыстычнай плыні».
Цікава, за 700-750 даляраў, якія выкладзе замежнік за тыдзень у Беларусі — куды за іх можа паехаць беларус?
«У Францыю, Гішпанію, Італію можна з’ездзіць за гэтыя грошы на экскурсійныя туры… За гэтыя грошы беларусы цяпер лятаюць у Турцыю, напрыклад. Нават за меншыя — можна паляцець на 10 начэй за 600 даляраў усяго. Можна паехаць практычна ў любую краіну за гэтыя грошы — і атрымаць лепшы сервіс. Бо аплочваючы 700 даляраў за тыдзень у Беларусі, турыст жыве ў трохзоркавым гатэлі, які зусім не апраўдвае гэтыя тры зоркі», - паведаміла тураператарка.
Супрацоўнікі турфірмы кажуць, што ў замежнікаў, якія любяць вандраваць, ёсць адпаведныя форумы ў інтэрнэце. І там Беларусь не надта шануюць…
«Адзін з нашых турыстаў, англічанін, пасля прыезду сюды, сказаў, што яго моцна адгаворвалі ехаць у Беларусь. Але ён, як чалавек цікаўны, вырашыў прыехаць паглядзець, бо вандруе шмат. А ўвогуле сярод еўрапейскіх турыстаў існуе такое меркаванне, што Беларусь — краіна экстрэмальнага турызму. Пішуць: «Будзьце гатовыя, што ў Беларусі афіцыянты не ўсміхаюцца, ангельскай мовы не ведаюць. Людзі ветлівыя, але паказаць гэтага не ўмеюць». У мінулым годзе былі шакаваныя, што за рушнік і бялізну ў гатэлі давялося даплачваць!»
Эксперт у галіне турызму, дырэктар выдавецтва «Рыфтур» і выдавец газеты «Турызм і адпачынак» Сяргей Плыткевіч мяркуе, што нашага брытанца, які ўцёк праз тры дні, проста недабраякасна абслужылі — не папярэдзілі, якія тут асаблівасці.
Плыткевіч мяркуе, што Беларусь увогуле не надта клапоціцца аб стварэнні станоўчага турыстычнага іміджу на міжнародным рынку:
«На жаль, імідж Беларусі на міжнародным турыстычным рынку не надта спрыяльны. Больш за тое, палякі і літоўцы задаюць пытанне: «А як да вас даехаць, а нас там не арыштуюць?» Гэта смешна з нашага боку, а з іншага боку гэта гаворыць пра тое, што дзяржава, турыстычныя ўлады не дапрацоўваюць. Пакуль не будзе спрыяльнага іміджу Беларусі, разлічваць на турыстаў немагчыма».
Гасціннасць беларусаў не ведае межаў
З замежнымі мовамі ў беларусаў пакуль не вельмі...
Таму пра такую колькасць турыстаў, як у іншых еўрапейскіх сталіцах, мы пакуль толькі марым
Напісаць каментар (157)
Навіны
па тэме
- Станут ли колхозники получать 1 миллион рублей?
- Рэальная сярэдняя зарплата ў Беларусі - менш за 200 даляраў
- Пластиковые карточки не актуальны: Зарплату выдают дровами и диванами
Экспарт
