За адзін дзень - два самагубствы ў бальніцах Менска
9- 17.09.2010, 11:35
Органы пракуратуры праводзяць праверкі па фактах самагубстваў двух пацыентаў у 9-й клінічнай бальніцы і РНПЦ псіхічнага здароўя ў Менску.
Як паведаміў БелаПАН старшы памочнік пракурора Менска Сяргей Балашоў, 16 верасня прыкладна ў 17.00 з балкона дзявятага паверху 9-й бальніцы выкінуўся 68-гадовы мужчына, які знаходзіўся на лячэнні. Пенсіянер памёр на месцы. Высветлілася, што за некаторы час да суіцыду мужчына знаходзіўся ў дрэнным настроі, казаў, што яму надакучыла жыць і хварэць.
У той жа дзень у Рэспубліканскім навукова-практычным цэнтры псіхічнага здароўя ў Навінках у туалетным пакоі была выяўлена ў пятлі 44-гадовая пацыентка.
Па першым выпадку праверку праводзіць пракуратура Маскоўскага раёна сталіцы, па другім - Цэнтральнага.