Галандскі дэпутат паставіў пытанне аб прызнанні беларускіх дэмакратаў законнымі прадстаўнікамі Беларусі

Пітэр Омтзігт звярнуўся да Камітэта Міністраў Савета Еўропы з патрабаваннем прызнаць апазіцыю як законнага прадстаўніка беларускага народа.

"Сітуацыя ў Беларусі выклікае моцную трывогу. Таму сёння я вынес гэтыя пытанні на абмеркаванне Камітэта Міністраў Савета Еўропы. Яны будуць у хуткім часе апублікаваныя, і я спадзяюся атрымаць адказы Савета міністраў, які складаецца з 47 міністэрстваў замежных спраў", паведаміў дэпутат парламента Нідэрландаў ад Хрысціянскай дэмакратычнай партыі (CDA), сябар Парламенцкай асамблеі Рады Еўропы, Пітэр Омтзігт charter97.org.

"Прэзідэнцкія выбары ў Беларусі 19 снежня 2010 г былі праведзеныя несумленна", адзначае палітык.

Дэпутат паставіў перад міністрамі наступныя пытанні:

- Ці згодны Камітэт Міністраў з тым, што пазбаўленыя волі кандыдаты з'яўляюцца палітзняволенымі, або яны давяраюць бесстароннасці беларускай судовай сістэмы?

- Ці будзе Камітэт Міністраў абмяркоўваць і ўводзіць забарону на выдачу віз для беларускіх чыноўнікаў у сувязі з тым, што кандыдаты ў прэзідэнты знаходзяцца ў турме?

- Ці зробіць Камітэт Міністраў афіцыйную заяву са сваёй пазіцыяй і асуджэннем бягучай палітычнай сітуацыі ў Беларусі?

- Ці наладзіць цяпер Камітэт Міністраў афіцыйныя сувязі з апазіцыяй як законнымі прадстаўнікамі беларускага народа?

- Ці можа Камітэт Міністраў адказаць на гэтыя пытанні перад тым, як адкрыецца першая частка сесіі Парламенцкай Асамблеі ў 2011?