Дырэктар «Аўтарадыё»: Вышэйшы гаспадарчы суд пакінуў нас экстрэмістамі

10 мая Вышэйшы гаспадарчы суд адхіліў скаргу «Аўтарадыё» на рашэнне Міністэрства інфармацыі, фактычна захаваўшы за радыёстанцыяй статус «экстрэмісцкай».

- Нашая скарга на рашэнне Мінінфармацыі не задаволеная. Суд пакінуў нас экстрэмістамі, - распавёў «Салідарнасці» дырэктар «Аўтарадыё» Юрый Базан. - Цяпер мы чакаем рашэння па другой скарзе аб прыпыненні вяшчання. Але, калі шчыра, надзеі на станоўчае рашэнне ўжо няма.

Нагадаем, «Аўтарадыё» падало дзве скаргі на рашэнне Вышэйшага гаспадарчага суду. Першая тычыцца рашэння папярэджання Мінінфармацыі, якое расцаніла ролікі кандыдата ў прэзідэнты Андрэя Саннікава экстрэмісцкімі, другое - рашэнне аб спыненні вяшчання папулярнай станцыі.

29 сакавіка 2011 г. суддзя Зміцер Аляксандраў пакінуў у сіле папярэджанне Міністэрства інфармацыі і захаваў забарону на вяшчанне, нягледзячы на ​​тое, што 9 сакавіка Вышэйшы гаспадарчы суд прызнаў папярэджанне Міністэрства інфармацыі несапраўдным.

15 мая будзе чатыры месяцы, як папулярная сталічная FM-станцыя знікла з эфіру.

- Рашэнне аб закрыцці нашай радыёстанцыі ляжыць за межамі «Закону аб СМІ». Нашыя абскарджанні ў першую чаргу былі накіраваныя на новы разгляд справы «Аўтарадыё», - пракаментаваў сітуацыю Юрый Базан. - Аднак гэтага не адбылося. Суд проста прыняў нашыя абскарджанні да разгляду і вось ужо адно з іх не задаволенае. З нагоды другой мы таксама не маем ілюзіяў.

- Другое рашэнне суда капіруе першае. Нашую скаргу не задаволілі і забарона на вяшчанне застаецца ў сіле. Цяпер мы звернемся ў наглядную інстанцыю Вышэйшага гаспадарчага суду, але ўжо цяпер мне цалкам відавочна, што нашая справа выйшла ў палітычную плоскасць, дзе рашэнні прымае не суд, - лічыць Базан.

Зараз радыёстанцыя практычна не працуе, аднак ейныя ўладальнікі працягваюць плаціць камунальныя плацяжы, аплочваць частату, каб захаваць юрыдычную асобу. Кіраўніцтва «Аўтарадыё» шукае шляхі і магчымасці рэарганізацыі і перанакіравання дзейнасці радыёстанцыі.

- Гэты год абвешчаны годам прадпрымальнасці, а для нашай радыёстанцыі ён праходзіць пад лозунгам «Паспрабуйце выжыць!», - рэзюмаваў суразмоўца.