Названыя прозвішчы абвінавачаных у выбуху ў метро
101- 20.07.2011, 13:20
Генпракурор Беларусі ўпершыню назваў прозвішчы абвінавачаных у здзяйсненні выбуху ў менскім метро.
«Вы шмат разоў называлі гэтыя прозвішчы. Гэта сакрэт палішынелю. Вы хочаце, каб я іх назваў. Канавалаў і Кавалёў», - сказаў на прэс-канферэнцыі ў сераду ў Менску Генеральны пракурор Беларусі Рыгор Васілевіч, перадае «Інтэрфакс».
Па ягоных словах, абодва абвінавачаных нарадзіліся ў 1986 годзе, пры гэтым адзін з абвінавачаных прызываўся на абавязковую вайсковую службу і ў сувязі з гэтым павінен быў здаваць адбіткі пальцаў.
Адказваючы на пытанне журналістаў аб тым, ці праўда, што гэтыя адбіткі былі здадзеныя і пасля згубленыя, Р. Васілевіч сказаў: «У банку дадзеных ягоных адбіткаў пальцаў не аказалася, хоць мне асабіста вельмі шкада, што такая велізарная праца не дазволіла прадухіліць гэты акт тэрарызму».
Генпракурор адзначыў, што вінаваты ў дадзеным факце супрацоўнік праваахоўных органаў усталяваны, у дачыненні да яго ўзбуджаная крымінальная справа і абраная мера стрымання.
Абвінавачаныя на мінулым тыдні прыступілі да азнаямлення з крымінальнай справай.
«14 ліпеня яны прыступілі да азнаямлення з крымінальнай справай. На працягу месяца яны маюць права знаёміцца. Зыходзячы з гэтага можна выказаць здагадку, калі справа можа пайсці ў суд», - сказаў Р. Васілевіч.
Генпракурор таксама падкрэсліў, што «ў 2009 годзе гэтая асоба (якая ўчыніла тэракт - ІФ) магла быць выяўленая», калі б была праведзеная дактыласкапія. «Тое, што гэтага чалавека маглі «вылавіць» у 2009 годзе, - гэта была б нашая дапамогу тым 15-ці чалавекам, якія загінулі, больш за 300 пацярпелым, некаторыя з якіх будуць інвалідамі», - сказаў ён, заўважыўшы, што псіхалагічны фон для адмовы ад праходжання дактыласкапіі стваралі і журналісты.
Р. Васілевіч нагадаў, што тады прапаноўваў ўвесці «адказнасць блізкіх сваякоў, нават бацькоў, калі яны не паведамляюць аб падрыхтоўцы цяжкага злачынства». Пры гэтым генпракурор заўважыў, што гэтая ініцыятыва, якая мае заканадаўчае ўжыванне ў некаторых краінах свету, не тычыцца тэракту 11 красавіка.
