На рынку «Экспабел» затрымалі валютчыка з Туркменістана
8- 23.08.2011, 10:08
Міліцыянты і супрацоўнікі падатковай інспекцыі затрымалі ў Менскім раёне валютчыка з Туркменістана з буйной сумай даляраў ЗША.
Грамадзянін Туркменістана 1992 года нараджэння быў затрыманы непадалёк ад вёскі Баравая Менскага раёна на тэрыторыі рынку «Экспабел», паведамілі БелТА ва УУС Менаблвыканкама.
Як растлумачылі ва УУС, гэты валютчык быў у распрацоўцы ўжо не першы дзень. На гэты раз аператыўнікі і падаткавікі канфіскавалі ў яго $19,5 тыс., якія ён спрабаваў збыць па досыць завышаным спекулятыўным курсе. Пры гэтым хлопец сцвярджаў, што ў наступны раз можа прадаць яшчэ больш - $20 тыс. Міліцыі атрымалася высветліць, што іншаземец скупляў валюту на беларуска-расейскай мяжы. У Беларусі ён знаходзіцца адносна нядаўна: вучыцца на другім курсе ў вну ў адным з абласных цэнтраў.
На туркменскага грамадзяніна быў складзены пратакол па ч.1 ст.11.2 «Парушэнне ўсталяванага парадку ажыццяўлення валютных аперацый» КаАП Беларусі.