Год, як змоўкла «Аўтарадыё»

12 студзеня 2011 года калектыў радыёстанцыі быў пастаўлены перад фактам заканчэння вяшчання.

Згодна з афіцыйнай фармулёўкай, прычынай стала распаўсюджванне ў эфіры матэрыялаў, якія ўтрымлівалі «публічныя заклікі да экстрэмісцкай дзейнасці», перадае «Радыё Свабода».

Так чыноўнікі Міністэрства інфармацыі ацанілі тэкст перадвыбарчага роліка кандыдата ў прэзідэнты Андрэя Саннікава - «Лёс краіны вырашаецца не на кухні, а на плошчы». Нягледзячы на ​​тое, што рэкламны шаблон быў растыражаваны і афіцыйнымі СМІ, праблемы паўсталі толькі ў «Аўтарадыё».

Дырэктар «Аўтарадыё» Юрый Базан са шкадаваннем канстатуе, што за мінулы год нічога ў лёсе ні радыёстанцыі, ні калектыву, які адпраўлены ў вымушаны адпачынак, не праяснілася. Перапіска з чыноўнікамі Міністэрства інфармацыі ніякага выніку не дае: асаблівага жадання вяртаць у эфір «крамольную станцыю» кіраўніцтва ведамства не выяўляе. Пры гэтым, як кажа Юрый Базан, у Міністэрстве сувязі да «Аўтарадыё» ніякіх прэтэнзій не маюць і гатовыя падлучыць яго да эфіру, як толькі будзе адпаведны дазвол з Міністэрства інфармацыі.

Таксама Юрый Базан успамінае, што ў пачатку спрэчная сітуацыя з Міністэрствам інфармацыі складалася на карысць «Аўтарадыё». 9 сакавіка Вышэйшы гаспадарчы суд прызнаў несапраўдным папярэджанне Міністэрства інфармацыі, а таксама рашэнне Рэспубліканскай камісіі па тэлебачанні і радыёвяшчанні аб спыненні вяшчання радыёстанцыі. Аднак ужо 17 сакавіка касацыйная калегія таго ж суда адмяніла ранейшае рашэнне і накіравала справу на паўторны разгляд. Наступныя паседжанні нічога добрага калектыву «Аўтарадыё» не прынеслі, а 10 мая касацыйная калегія Вышэйшага гаспадарчага суду канчаткова адхіліла скаргу кіраўніцтва радыёстанцыі аб прызнанні рашэння спыніць вяшчанне несапраўдным.