Лепшым ідэолагам Віцебшчыны заплацяць па 30 базавых велічынь
31- 27.01.2012, 10:03
Па рашэнні Віцебскага аблвыканкама штогод будзе праводзіцца конкурс на лепшую арганізацыю ідэалагічнай работы ў працоўных калектывах Віцебскай вобласці.
Лепшыя ідэолагі атрымаюць прэмію ў памеры 30 базавых велічынь (на сённяшні дзень 1 050 000 рублёў), піша news.vitebsk.cc.
Усяго будзе вызначана адзінаццаць лепшых байцоў ідэалагічнага фронту ў наступных сферах: прамысловасць; будаўніцтва; сельскагаспадарчая вытворчасць; транспарт і сувязь; жыллёва-камунальная гаспадарка; гандаль і бытавое абслугоўванне; ахова здароўя і аздараўленне; вышэйшая, сярэдняя спецыяльнаяы і прафесійна-тэхнічная адукацыя; агульная сярэдня адукацыя; культура; банкаўская сфера.
Конкурс павінен праводзіцца ў два этапы. Для ацэнкі удзельнікаў конкурсу на першым этапе будуць створаныя гарадскія і раённыя камісіі, а на другім этапе - абласная. Яны будуць ацэньваць працу ідэолагаў па чатырнаццаці паказчыках, сярод якіх выкананне сацыяльна-эканамічных паказчыкаў развіцця арганізацыі і іхняе ідэалагічнае забеспячэнне, праца інфармацыйна-прапагандысцкіх груп арганізацыі або афармленне нагляднай агітацыі і інфармацыйных стэндаў, выкарыстанне дзяржаўнай сімволікі, сімволікі рэгіёну, арганізацыі.
Пераможцаў будуць узнагароджваць дыпломамі і прэміямі ва ўрачыстай абстаноўцы. Выплата прэмій ажыццяўляецца за кошт сродкаў абласнога бюджэту.