На беларуска-літоўскай мяжы - чэргі з фур
6- 30.01.2012, 17:00
Чарга вялікагрузных аўтамабіляў на беларуска-літоўскай мяжы з боку Беларусі абумоўленая «скрыўленнем транзітных плыняў».
Пра гэта заявілі агенцтву «Інтэрфакс-Захад» у Дзяржпамежкамітэце Беларусі.
«Больш за 400 фур цяпер знаходзіцца ў пункце пропуску Каменны Лог. Гэта звязана з тым, што частка транспарту, які ўязджае на тэрыторыю Беларусі праз Польшчу, выязджае праз Літву. Да прыкладу, з боку Польшчы заязджае ў два разы больш вялікагрузных аўтамабіляў, чым выязджае», - удакладнілі ў ДПК.
На думку памежнікаў, гэта звязана з адрозненнем ў нормах ўвозу паліва і некаторых іншых тавараў, якія існуюць у Літве і Польшчы.
«Памежкамітэт аператыўна інфармуе пра стан на мяжы, кіраўнікам транспартных кампаній варта было б ўлічваць гэтыя звесткі пры складанні маршруту», - падкрэслілі ў ДПК.
Прадстаўнік асацыяцыі аўтаперавозчыкаў Літвы «Linava» Гіціс Вінцявічус заявіў агенцтву «BNS» у панядзелак аб занепакоенасці сітуацыяй на мяжы з Беларуссю, якая ўскладняецца моцнымі маразамі.
«Прычыны, па якіх утварыліся такія чэргі, нам невядомыя. У Літву фуры вяртаюцца пераважна паражняком, без грузу. У маразы ў іх і выдаткі гаручага вялікія, і трэба ўвесь час ацяпляцца. Сітуацыя нас непакоць», - сказаў Г. Вінцявічус.