Студэнт БДУ: Вучымся ў «халоднай адрыне» (Фота)

Ва ўніверсітэцкім корпусе няма ацяплення, туалет не працуе, а ў сталовай ідзе рамонт.

Перад пачаткам новага навучальнага года ўсе беларускія ВНУ сур'ёзна паднялі кошты. Веды падаражэлі па ўсім вядомай прычыне: ва ўмовах нестабільнай эканомікі трэба пакрываць бягучыя выдаткі і плаціць жалаванне выкладчыкам. Але ці гатовыя інстытуты і ўніверсітэты гарантаваць студэнтам прымальныя ўмовы для вучобы? Хто плаціць, той хоча заказваць і музыку. А гэта атрымліваецца не заўсёды.

Сярод іншых кошт навучання павялічыў і Дзяржаўны інстытут кіравання і сацыяльных тэхналогій (ДІКСТ) БДУ. Тут рыхтуюць спецыялістаў у сферы кіравання, сацыяльнай працы, дызайну і права. Адзін са студэнтаў звярнуўся ў рэдакцыю onliner.by і расказаў, што ў корпусе інстытута на вуліцы Маякоўскага вучыцца папросту немагчыма.

- Стан дадзенай установы жудасны, гэта проста нікчэмнасць, - катэгарычны Сяргей. - Да гэтага часу там няма ацяплення. На першым паверсе не працуе туалет. У сталовай вядзецца рамонт, але яна працягвае працаваць. Я платнік, плачу амаль 12 млн. Мяне гэта вельмі раздражняе. Чаму за гэтыя грошы я вымушаны хадзіць у нейкую халодную «адрыну»?!

На форумах у інтэрнэце студэнты называюць корпус «навучальнай ганьбай». Супрацоўнікі інстытута прызнаюць: выгляд не самы прывабны. Але прапануюць пачакаць.

- Гэты корпус на баланс ДІКСТа перайшоў толькі ў жніўні. Раней ён належаў БДУ, мы арандавалі будынак. Вось скажыце, што можна адрамантаваць за месяц? Усё, што магчыма, робіцца. І туалеты, і плітка, і гарачая вада. Шкада, што студэнты гэтага не разумеюць, - кажуць яны.

Аўдыторыі маюць цалкам стандартны выгляд.

На мінулым тыдні, па словах спецыялістаў, у будынку «прарвала ацяпленне».

- Цепласеткі вельмі старыя, універсітэтам яны не рамантаваліся. Прыйшлі да высновы, што трубы трэба мяняць цалкам, інакш зіму не перажывем. А цяпло з'явіцца, калі трасу раскапаюць.

На новы будынак, зразумела, у інстытута грошай няма.

- Каб пабудаваць новы корпус, мы павінны будзем адмовіцца ад зарплаты. На наш будынак на вуліцы Шпалернай бралі вельмі вялікі крэдыт і толькі-толькі яго выплацілі. Затое зрабілі ўсё на сумленне. Так будзе і тут.

Студэнтам-платнікам, ды і бюджэтнікам ад гэтага не лягчэй. Асабліва калі ўдараць халады. Зрэшты, такіх, язык не паварочваецца назваць, «храмаў» ведаў у Менску не адзін, і не два...