Генадзь Фядыніч: Улада баіцца любых сходаў рабочых

Таму рэжым забараняе пікеты да міжнароднага дня барацьбы за годную працу, лічыць прафсаюзны лідэр.

Старшыня прафсаюза работнікаў радыёэлектроннай прамысловасці (РЭП) Генадзь Фядыніч пракаментаваў сайту charter97.org забароны па ўсёй краіне пікетаў, прысвечаных міжнароднаму дню барацьбы за годную працу, які адзначаецца 7 кастрычніка.

«У Магілёве ўладам не спадабалася абранае намі месца, у Менску ў парку 50-годдзя Кастрычніка нам забаранілі праводзіць пікет па той жа прычыне. Па яшчэ адной заяўцы ў сталіцы нам адказалі, што заява не адпавядае заканадаўству, хоць мы ўсюды падавалі аднолькавыя заяўкі. Дазволілі праводзіць пікет толькі на Бангалоры. Будзем разбірацца, калі трэба - пададзім ў суд», - распавёў Генадзь Фядыніч.

«На пікетах мы збіраліся інфармаваць рабочых аб тым, як баставаць, куды паведамляць пра пратэсты на прадпрыемстве, як весці перамовы з кіраўніцтвам заводаў, як абараняць свае правы і так далей. Многія рабочыя, асабліва з рэгіёнаў, не ведаюць гэтага», - адзначыў прафсаюзны лідэр.

«Улада баіцца, калі людзі збіраюцца, а тым больш, калі збіраюцца рабочыя. Але змагацца з гэтым - усё роўна што заганяць хваробу ўглыб, гэта зусім неэфектыўна», - лічыць эксперт.

«Несумненна, улада баіцца стыхійных пратэстаў працоўных, якія ў апошні час пастаянна ўспыхваюць на розных вытворчасцях. Калі ўлада незаконна забараняе пікеты ў дзень барацьбы за годную працу, яна сапраўды баіцца збору рабочых і іх інфармавання», - упэўнены Генадзь Фядыніч.