Студэнты інтэрната ў Горках: З-за цвілі нас пагражаюць выселіць (Фота)

Сцены спешна пабудаванага да «Дажынак», інтэрната сельгасакадэміі ў Горках пакрыліся цвіллю.

Фатаграфіі, якія гавораць самі за сябе, на мінулым тыдні размясцілі ў інтэрнэце студэнты. На іх відаць, як столь, тумбачка і рэчы маладых людзей пакрыліся налётам. Кіраўніцтва райвыканкама на днях заявіла, што са скаргамі па гэтым пытанні ніхто не звяртаўся. У адказ на такую рэакцыю ад імя бацькоў да мясцовай улады звярнулася маці аднаго са студэнтаў. Рэгіянальны партал horki.info публікуе сёння яе ліст.

«Ад імя бацькоў хачу афіцыйна заявіць, што ў новым інтэрнаце, пабудаваным да «Дажынак», маецца вельмі шмат недаробак, - піша Святлана. - Цвіль і волкасць - гэта не прыдумка нашых дзяцей і не фотамантаж, а рэальныя ўмовы жыцця, з якімі давялося сутыкнуцца студэнтам! Вельмі шкада, што райвыканкаму зручней рабіць выгляд, што праблем няма, чым вырашаць іх!

У інтэрнаце няма вентыляцыі. Студэнтам было прапанавана трымаць адкрытымі вокны дзень і ноч! Цвіль змываць, а калі правяраючыя знойдуць у пакоях цвіль, то студэнтаў прыгразілі выселіць за тое, што не дамылі, не дацерлі, не дапралі, не дагледзелі!

У чым вінаватыя студэнты, якія там пражываюць? У тым, што распавялі і паказалі праблемы будынка, які пабудавалі спехам? А можа, яны вінаватыя, што не захацелі ціхенька жыць у такім добраўпарадкаваным інтэрнаце з цвіллю і вільгаццю, якія згубна ўплываюць на іх здароўе?

Прашу ад імя бацькоў не запалохваць студэнтаў, не прымушаць вылізваць пакоі, а разгледзець і ліквідаваць не толькі вентыляцыю ў будынку, але і краны, якія пастаянна падцякаюць, вадаправод і інш. праблемы, запісаныя ў часопісе інтэрната».

Нагадаем, раней Лукашэнка з крытыкай таго, як развальваюцца аб'екты, пабудаваныя ў горадзе да «Дажынак», абрынуўся на прэм'ер-міністра Міхаіла Мясніковіча.

Кіраўніку перадалі фатаграфіі з новага інтэрната БДСГА, дзе сцены пакрываюцца цвіллю. Аб'ект быў здадзены ўсяго месяц таму. Лукашэнка літаральна крычаў на Міхаіла Мясніковіча і патрабаваў «злізаць усю цвіль языком».