Новым кіраўніком МЗС Літвы можа стаць амбасадар у Беларусі Лінкявічус

Сёння ў Літве пачнуцца кансультацыі з нагоды новага Кабінета міністраў.

Шмат што стане зразумела пасля сустрэчы прэзідэнта краіны Далі Грыбаўскайтэ і лідэра Літоўскай сацыял-дэмакратычнай партыі, якая перамагла на парламенцкіх выбарах, Альгірдаса Буткявічуса.

Лідэры кааліцыі, якая ўтварылася пасля першага тура (ЛСДП, Партыя працы і «Парадак і справядлівасць»), ужо правялі папярэднія перамовы, у ходзе якіх было прынята рашэнне, што новы ўрад узначаліць прадстаўнік ЛСДП. Па іншых міністрах пакуль захоўваецца няяснасць.

Аднак, як стала сёння вядома, Альгірдас Буткявічус абмовіўся, што новым міністрам замежных спраў можа стаць цяперашні амбасадар Літвы ў Беларусі Лінас Лінкявічус.

«Аб такой магчымасці новага прызначэння Лінкявічуса гаварылася ў літоўскіх СМІ і да выбараў, - нагадаў карэспандэнту сайта «Товарищ.online» палітычны аглядальнік Раман Якаўлеўскі. - Такі варыянт з перамяшчэннем амбасадара Літвы ў Беларусі ўжо меў месца і раней з амбасадарам Вайтэкунасам, які зараз служыць амбасадарам у Кіеве».

Што тычыцца Лінкявічуса, то, па словах палітаглядальніка, ён добра вядомы літоўскаму істэблішмэнту і электарату ў цэлым, так як ён быў міністрам абароны і прадстаўніком Літвы (амбасадарам) у НАТА.

У сувязі з кадравымі перастаноўкамі ў знешнепалітычным ведамстве, узнікае слушнае пытанне: ці паўплывае гэта на ўзаемаадносіны дзвюх дзяржаў?

Раман Якаўлеўскі кажа, што, мяркуючы па зробленых цяперашнім амбасадарам Літвы ў Беларусі Лінкявічусам заявах па двухбаковаму супрацоўніцтву, «палітыка Вільні па-ранейшаму будзе будавацца ў рэчышчы агульнай палітыкі ЕЗ. Гэта значыць, у цяперашні час я не бачу якіх-небудзь перадумоў для сустрэчы кіраўнікоў двух знешнепалітычных ведамстваў, адзін з якіх працягвае заставацца персонай нон грата для Захаду».