Лукашэнка - чыноўнікам: Адразу кайданкі купляйце

На Алімпійскім сходзе кіраўнік распавёў значна больш, чым паведамілі афіцыйныя крыніцы.

Гаворка ішла аб асабняках, якія кіраўніцтва спартыўнай галіны будавала за казённы кошт, жуллі на стадыёне «Дынама», нямэтавым выкарыстанні велізарных сум і многім іншым.

У справаздачы аб Алімпійскім сходзе, апублікаванай на афіцыйным сайце кіраўніка Беларусі, апроч іншага, змяшчаецца выказванне Аляксандра Лукашэнкі: «Я прапанаваў вам сваю «страху» у тым ліку для таго, каб вы, спартсмены, трэнеры і кіраўнікі спорту, маглі спакойна рабіць сваю справу». Пра тое, чым скончылася «страхаванне», піша «Салiдарнасць». Выданне прыводзіць шэраг эпізодаў, якія ў справаздачы дзяржаўных СМІ не ўвайшлі.

- Раскажыце, Алег Леанідавіч, якія ж прычыны прывялі да такой катастрофы ў ваш перыяд праўлення, - заявіў Аляксандр Лукашэнка, звяртаючыся да міністра спорту Алега Качана (зараз ужо былога). - Усё можаце распавядаць: пра асабнякі, якія вы будуеце за кошт спартыўнай галіны, дарэчы, з памочнікам, можа, з адным, з другім віцэ-прэзідэнтам. Усе расказвайце! Нашым людзям цікава будзе паслухаць. Гэта таксама, я думаю, адна з прычын катастрофы.

Выступленне дырэктара Рэспубліканскага цэнтра алімпійскай падрыхтоўкі па конным спорце і конегадоўлі Віктара Міхадзюка кіраўнік праанансаваў наступным чынам:

- Зараз вам раскажа Міхадзюк, як трэба базу алімпійскай падрыхтоўкі ствараць і адначасова палацы будаваць. Давайце, калі ласка. А то міністр прамаўчаў, памочнік таксама. Можа, вы распавядзеце, як пілаваць, вазіць, будаваць, як коней за бясцэнак прадавалі, нагадаеце, ці то Заічкову (Ігар Заічкоў займаў пасаду памочніка Лукашэнкі па спорце. Звольнены разам з Алегам Качаном 28 кастрычніка), ці то яшчэ камусьці. Расказвайце. Гучна, выразна... Калі мяне дэзінфармавалі, я перад вамі публічна папрашу прабачэння. Але калі нешта пацвердзіцца, вы адразу кайданкі купляйце, каб вам не чаплялі іх, бярыце і ідзіце туды, куды я сказаў. Я вам гэтага не дарую. Мы не такія багатыя, каб абслугоўваць тут асобных кітоў, якія яшчэ і лайдачаць.

Затым цунамі найвышэйшага гневу накрыла яшчэ многіх.

- Рыхтуючыся да Алімпійскага сходу, я паралельна даручыў Камітэту дзяржкантролю і іншым структурам праверыць, як жа вы рыхтаваліся да галоўных стартаў чатырохгоддзя, - распавёў Аляксандр Лукашэнка. - Вынікі сумныя. Аказалася, што з-за бяздзейнасці службовых асоб Мінспорту частка востра неабходнага інвентара была закуплена напярэдадні, падчас і нават пасля Алімпіяды! Алімпіяда прайшла, а яны закупілі абсталяванне, каб алімпійскіх чэмпіёнаў рыхтаваць. Больш за паўмільярда рублёў прастойвае цяпер. А сёння выступаў спецыяліст па конях, там нямэтавага выкарыстання каля 600 мільёнаў рублёў выяўлена! Праўда, Заічкоў гэта з дакладу ўбраў і выхваляўся свайму памагатаму: «Ты не хвалюйся, я выкрасліў!» Ды вас толькі з-за гэтага трэба ўзяць і выгнаць з працы. І не рабіце выгляд, што гэта не так! (Выканкаму ў цэлым) Кругавая парука! Гэта знахабіцца да такой ступені... Бародзіч (старшыня цэнтральнага савета рэспубліканскага дзяржаўна-грамадскага аб'яднання «Дынама»), вы каго мне прапанавалі ў памочнікі?! Вось яшчэ праваліце дынамаўскую каманду і пойдзеце разам з ім вуліцу мясці! Асабліва набліжаны генерал!

Таксама Аляксандр Лукашэнка прайшоўся па стадыёне «Дынама»:

- Пасылаю Якабсона (старшыня камітэта Дзяржкантролю - заўв.рэд.), кажу: «Аляксандр Серафімавіч, схадзі паглядзі, што там робіцца». Ён мне як перадаў фатаграфіі - ведаеце, мне дрэнна стала. Іх, Аляксандр Серафімавіч, трэба ўсіх пасадзіць! Усіх нягоднікаў! Таму што гэта першы аб'ект, які я з салдатамі прыводзіў у парадак. Пакінулі ў сябе гэты рынак. (У залу) Куды грошы падзелі ад рынку? (Якабсону) Займіцеся прынцыповым чынам, давядзіце да канца. Нікога не літуйце! Жуллё. І гэта прама пад вокнамі Мінспорту. (Качану) Табе што, цяжка было зайсці на стадыён і паглядзець, што там бярозкі растуць? Там, дзе людзі павінны сядзець? І гэта датычыцца ўсіх і ўсёй спартыўнай інфраструктуры...

Зрэшты, Лукашэнка абураўся дарма. Менавіта да такіх вынікаў і вядзе любое «страхаванне».