У Менску затрыманы серыйны маньяк

Супрацоўнікі міліцыі па падазрэнні ў здзяйсненні серыі згвалтаванняў дзяўчын у Менску затрымалі раней судзімага 24-гадовага менчука.

«У ходзе разглядаў затрыманы прызнаўся ў здзяйсненні 20 нападаў на дзяўчын», - паведаміла агенцтву «Інтэрфакс-Захад» у аўторак прэс-афіцэр РУУС Фрунзенскага раёна Менска Ала Галубовіч.

«Са слоў самога затрыманага, хуліганскія дзеянні ён здзяйсняў у мікрараёнах Кунцаўшчына, Каменная Горка, Захад, Сухарава», - распавяла прэс-афіцэр.

«Убачыўшы на вуліцы самотную дзяўчыну, зламыснік накіроўваўся следам. Для нападу падбіраў адасобленае месца: пад'езд, ліфт, пустыр. Абраўшы момант, хапаў ахвяру і спрабаваў пакратаць яе інтымныя месцы. Пасля таго, як дзяўчына пачынала крычаць, супраціўляцца або клікаць на дапамогу, ён хаваўся. Разам з тым, хлопец прызнаўся, што аднойчы ён зайшоў у сваіх дзеяннях і далей. Шакаваная дзяўчына не аказвала супраціву, і ён паспрабаваў згвалтаваць яе. Перашкодзіў зрабіць гэта позні мінак», - паведаміла Галубовіч.

Яна адзначыла, што «затрыманы ўжо быў раней двойчы судзімы, прычым за злачынствы сэксуальнага характару». «Вызваліўся з месцаў пазбаўлення волі ў сакавіку, і як сам прызнаўся, неўзабаве пачаў адчуваць сэксуальную цягу да незнаёмых дзяўчын, якія сустракаліся на вуліцы», - удакладніла прэс-афіцэр.

«Аб сваіх дзеяннях ён распавёў міліцыі досыць падрабязна, спыняючыся на абставінах і дэталях. Пры гэтым у міліцыю не паступала заяў ад пацярпелых ад яго дзеянняў, не было інфармацыі аб падобных злачынствах і з іншых крыніц», - распавяла Галубовіч.

У сувязі з гэтым, адзначыла яна, супрацоўнікі міліцыі звяртаюцца да магчымых ахвяр затрыманага з просьбай паведаміць пра сябе.