У Польшчы выйшаў раман Караткевіча «Хрыстос прызямліўся ў Гродне»
12- 9.10.2012, 15:54
Пераклад кнігі зрабіла Малгажата Бухалік.
Раман выйшаў у выдавецтве Oficyna 21 і ўжо на гэтым тыдні з'явіцца на паліцах польскіх кніжных крамаў. Гэта першая цэласная публікацыя рамана Караткевіча ў Польшчы, перадае «Еўрарадыё».
У рэцэнзіі вядомага культурнага часопіса Przekrój гаворыцца: «Раман быў напісаны ў палове 1960-х, задоўга да «Кода да Вінчы», «Імя ружы» Умберта Эка, і нават да оперы «Ісус Хрыстос суперзорка» Эндру Лойда Вэбера.
Уладзімір Караткевіч, вялікі беларускі пісьменнік, апярэдзіў іх усіх і памёр у 1984, не здолеўшы прабіцца да сусветнага літаратурнага працэсу, хоць цалкам гэтага заслугоўваў».