Беларусы ЗША патрабуюць санкцый супраць МАЗа, МТЗ і «Беларуськалія»

Арганізацыя «Беларусы ў выгнанні» накіравала ліст у Раду ЕЗ з патрабаваннем увесці санкцыі супраць кампаній, якія фінансуюць рэжым Лукашэнкі.

«У 2012 годзе Рада Еўрапейскага Звязу павялічыла спіс фізічных і юрыдычных асоб, на якія распаўсюджваюцца візавыя і эканамічныя санкцыі. Тым не менш, некаторыя з найбуйнейшых фінансавых фундатараў рэжыму Лукашэнкі далей атрымліваюць прыбытак за кошт гандлю з ЕЗ і застаюцца беспакаранымі», - гаворыцца ў лісце, апублікаваным на сайце арганізацыі (пераклад - charter97.org)

Ягоныя аўтары заклікаюць Раду ЕЗ павялічыць спіс кампаній, на якія распаўсюджваюцца санкцыі, і ўнесці ў яго тыя фірмы, прыбытак якіх атрыманы ад гандлю з еўрапейскімі краінамі.

«Спыненне прытоку сродкаў у скарб рэжыму і пакаранне людзей, якія кіруюць кампаніямі, што фінансуюць беларускія ўлады, з'яўляецца адзіным эфектыўным спосабам заахвочвання развіцця дэмакратыі ў нашай краіне», - заяўляюць аўтары ліста.

Арганізацыя «Беларусы ў выгнанні» падала спіс кампаній, у дачыненні да якіх прапануе ўвесці санкцыі:

- Беларускі аўтамабільны завод,

- Беларуская нафтавая кампанія (галоўны экспарцёр нафтапрадуктаў),

- Беларускі нафтавы гандлёвы дом (знаходзіцца пад санкцыямі ў ЗША),

- Беларуская калійная кампанія (найбуйнейшы экспарцёр калійных угнаенняў),

- «Беларуськалій» (найбуйнейшы вытворца калійных угнаенняў),

- «Белнафтахім» (знаходзіцца пад санкцыямі ў ЗША),

- «Белшына» (знаходзіцца пад санкцыямі ў ЗША),

- Мазырскі НПЗ,

- «Нафтан» (знаходзіцца пад санкцыямі ў ЗША)

- Менскі аўтамабільны завод,

- Менскі трактарны завод.

Таксама аўтары звароту патрабуюць занясення ў спіс неўязных у ЕЗ генеральных дырэктараў кампаній, якія пералічаныя ў лісце.

«Беларусы ў выгнанні» - няўрадавая арганізацыя, створаная ўцекачамі з Беларусі ў ЗША.