«Будзьма беларусамі!» - пераможца One Short Film Fest
14- 27.02.2012, 16:24
Анімацыйны фільм «Будзьма беларусамі!» стаў пераможцам фестывалю One Short Film Fest у намінацыі «Анімацыя».
Паводле інфармацыі на афіцыйным сайце фестывалю, фільм-пераможца паедзе на міжнародныя фестывалі - партнёры One Short Film Fest: METRES (Цвер, РФ), АРТ-Кіно (Масква, РФ), Манхэтанскі фестываль (NY, USA) і Kurzfilmtage Winterthur (Цюрых, Швейцарыя).
Кінафестываль ONE SHORT FILM FEST адбыўся ў Беларусі ў другі раз. У фестывалі прынялі ўдзел кароткаметражныя фільмы ў чатырох намінацыях:
- Гульнявое кіно
- Дакументальнае кіно
- Арт-хаўс
- Анімацыя
Пераможцамі сталі стужкі «Чалавек на зямлі» (дакументальны фільм), «Добрай раніцы, зорнае святло» (арт-хаўс) і «Irrelative» (гульнявое кіно).
Мультыплікацыйны фільм «Будзьма беларусамі!» выйшаў у межах сумеснага праекта культурнай кампаніі «Будзьма беларусамі!» і партала TUT.BY - «БудьмаTUT». Першая спроба паказаць за пяць хвілін тысячагадовую гісторыю Беларусі сабрала за гэты час амаль мільён праглядаў на розных рэсурсах ў Сеціве. 28 мая споўніцца год з моманту першай дэманстрацыі анімацыйнага фільма, які ўжо стаў прэцэдэнтам у сучаснай беларускай культуры.
