Іван Шыла патрабуе закрыць турму на Акрэсціна
8- 15.03.2012, 12:08
Актывіст «Маладога Фронту» падаў скаргу на ўмовы ўтрымання ў Цэнтры ізаляцыі правапарушальнікаў на вуліцы Акрэсціна.
Моладзевы актывіст лічыць, што ўмовы ўтрымання ў гэтай сумна вядомай установе парушаюць артыкул 7 Міжнароднага пакта аб грамадзянскіх і палітычных правах «Забарона катаванняў або жорсткага бесчалавечнага абыходжання ці пакарання, якое зневажае чалавечую годнасць», паведамляе сайт protivpytok.org.
Іван Шыла напісаў зварот у Рэспубліканскую санітарна-эпідэміялагічную станцыю МУС, а таксама ў пракуратуру горада Менска.
У сваіх зваротах Іван Шыла паказвае на наступныя парушэнні:
- Поўная адсутнасць мэблі ў камеры, што парушае арт. 25 правілаў унутранага распарадку;
- Нізкая тэмпература ў камеры і адсутнасць вентыляцыі;
- Фактычнаея адсутнасць спальнага месца і бялізны;
- Нездавальняючы санітарна-гігіенічны стан камеры, прыніжаючы чалавечую годнасць;
- Недастатковае асвятленне;
- Забарона харчовых перадач і непадаванне пітной вады;
- Адсутнасць належнай медыцынскай дапамогі і інш.
Шыла патрабуе прызнаць умовы ўтрымання ў Цэнтр ізаляцыі правапарушальнікаў ГУУС Менгарвыканкама жорсткімі, бесчалавечнымі, што зневажаюць чалавечую годнасць, а таксама правесці праверку і закрыць Цэнтр ізаляцыі правапарушальнікаў да прывядзення ў адпаведнасць з патрабаваннямі заканадаўства.