Дыктатар шантажуе ЕЗ кантрабандай і нелегальнай міграцыяй

У адказ на санкцыі ЕЗ беларускія ўлады пагражаюць адкрыць мяжу для крыміналу.

Як паведаміла БелаПАН крыніца ў Дзяржаўным памежным камітэце, улічваючы сітуацыю, якая склалася і зыходзячы са сваіх магчымасцяў, беларускае памежнае ведамства пераходзіць да ажыццяўлення аховы мяжы (кантрабанда, нелегальная міграцыя і гэтак далей) па такім жа прынцыпе, якім кіруюцца краіны-суседзі.

Гаворка ідзе пра тое, што прыярытэт будзе аддадзены кантролі за уездам у Беларусь, тады як раней намаганні па забеспячэнні памежнай бяспекі на ўезд і выезд былі размеркаваныя раўнамерна.

Ужо зараз вядома, што для ўзмацнення аховы ўчастка мяжы з Украінай, у мэтах прадухілення кантрабанды і напярэдадні футбольнага чэмпіянату «Еўра-2012» туды перакідваецца частка сіл і сродкаў органаў памежнай службы з заходняга і паўночна-заходняга участкаў мяжы.

«Такую рэч, як мяжа, палітызаваць небяспечна, але зараз нас паставілі ў такія ўмовы. Любыя санкцыі ў першую чаргу адбіваюцца на мяжы. Раней мы вельмі шмат працы рабілі за нашых заходніх калегаў, якія дазваляюць сабе страйкаваць. Часцяком яны толькі атрымлівалі ад нас інфармацыю аб тым, што мы кагосьці не прапусцілі, прадухілілі ўвоз на іх тэрыторыю чагосьці. З санкцыямі яны трапілі ў сваю ж пастку. Таму што зараз пытанні бяспекі мяжы прыйдзецца пераглядаць з улікам нашых рэальных магчымасцяў і працаваць, як працуюць яны, - на ўезд. Пры гэтым, натуральна, свае пытанні бяспекі на мяжы на выезд з краіны памежнае ведамства будзе забяспечваць ў поўным аб'ёме», - заявіла крыніца ў памежведамстве Беларусі.

Суразмоўца агенцтва таксама падкрэсліў, што менавіта ў краінах-суседзях створаныя такія ўмовы і магчымасці, дзякуючы якім «цікавая» кантрабанда з Беларусі, - напрыклад паліва і тытунёвыя вырабы.

Акрамя таго, ён звярнуў увагу на тэхнічныя аспекты аховы польскага ўчастка мяжы. Дзеючая там з савецкіх часоў сістэма даўно вычарпала свае рэсурсы і патрабуе замены на больш сучасную, адзначыў суразмоўца. Толькі на яе ўтрыманне за год сыходзіць 3 млрд. рублёў. Пры гэтым камплектуючых да такой сістэмы даўно не вырабляецца. Хоць, па словах суразмоўцы агенцтва, польскі бок гэтая шматпрофільная эшаланаваная сістэма вельмі задавальняе. Сама ж Польшча на мяжы з Беларуссю мае толькі «лёгкую» сістэму аховы.