Лукашэнка заклікаў Касцёл стаць ягоным «адвакатам» на Захадзе

Дыктатар лічыць, што каталіцкая Царква павінная наладжваць адносіны паміж Беларуссю і Захадам.

«Вядома, скажу шчыра, мы разлічвалі на большае ў супрацоўніцтве з каталіцкай Царквой. Лічым, што каталіцкая Царква відавочна не дапрацоўвае ў наладжванні стасункаў паміж Беларуссю і Заходняй Еўропай. Я нават не кажу ў цэлым аб Еўрапейскім звязе, таму што вядома, хто там грае першую скрыпку», - заявіў А.Лукашэнка, сустракаючыся ў панядзелак у Менску з амбасадарам Суверэннага Мальтыйскага Ордэна Паўлем Фрыдрыхам фон Фурхерам, перадае «Інтэрфакс-Захад».

Таму, адзначыў А.Лукашэнка, «нам вельмі хацелася праз вас данесці гэты сігнал». «У вас (у Мальтыйскім Ордэне - ІФ) прыстойны ўплыў у Святым Прастоле, у вас там шмат уплывовых людзей, якія павінныя, у рэшце рэшт, паглядзець, што адбываецца ў адносінах з краінай, дзе другая па велічыні на постсавецкай прасторы канфесія - каталікі, што тут жывуць добрыя людзі, якія хочуць жыць у сяброўстве», - сказаў ён.

«Мы на гэта вельмі спадзяемся, нягледзячы на тое, што вы будзеце працаваць у іншай краіне», - адзначыў А.Лукашэнка, маючы зносіны з амбасадарам Ордэна, які завяршае сваю місію ў Беларусі.

У прыватнасці, кіраўнік дзяржавы падзякаваў амбасадару за прасоўванне ў Беларусі чарнобыльскіх праграм, дапамогу беларускім дзецям, народу краіны. «Гэта не забываецца», - заявіў А.Лукашэнка.

«Так і палітычных пытанняў не было, каб вы не ўнікалі ў іх. Калі вы бачылі, што можаце дапамагчы, вы гэта рабілі. Гэта дарагога варта», - адзначыў кіраўнік дзяржавы.

«Мы б хацелі, каб усе заходнія амбасадары працавалі ў гэтым ключы, наладжвалі добрыя адносіны. Таму што дабрыня і адклікаецца дабрынёй», - заявіў Лукашэнка.

У сваю чаргу амбасадар Суверэннага Мальтыйскага Ордэна адзначыў, што «Ордэн у межах сваіх магчымасцяў намагаўся тут дапамагчы і ўплываць паміж Беларуссю і заходнім светам». «Пункт гледжання нашага ўрада складаецца ў тым, што дыялог, размова заўсёды дапамагаюць вырашаць праблемы, трэба размаўляць адзін з адным», - сказаў П.Ф. фон Фурхер.

Ён выказаў упэўненасць у тым, што «Мальтыйскі Ордэн зможа адыграць пазітыўную ролю ў адносінах паміж вашай краінай і Еўропай».