Кіраўнік «Крэдэксбанка» адхрышчваецца ад абвінавачванняў Мінфіна ЗША

Гендырэктар беларускага ЗАТ «Крэдэксбанк» Аляксандр Аксяневіч абвяргае абвінавачванні Мінфіна ЗША ў адмыванні грошай банкам.

«Натуральна, дзеля нас гэта поўная нечаканасць. Гэта поўнае глупства. Зараз мы спрабуем усталяваць кантакты з Мінфінам ЗША, каб дамагчыся абвяржэння гэтай, мякка кажучы, непраўдападобнай інфармацыі», - заявіў агенцтву «Інтэрфакс-Захад» А.Аксяневіч.

«Зараз мы кансультуемся з Нацыянальным банкам Беларусі адносна працэдуры кантактаў з Мінфінам ЗША», - дадаў ён, падкрэсліўшы шкоду, нанесеную рэпутацыі банка.

Мінфін ЗША ў апублікаваным учора дакладзе назваў беларускі «Крэдэксбанк» «ключавым цэнтрам глабальнага адмывання грошай» і ўключыў яго ў профіль 311 Патрыятычнага Акту, як установу, якая выклікае «першачарговую занепакоенасць з нагоды ўдзелу ў адмыванні грошай».

Амерыканскія ўлады падазраюць, што ўваходзіць у групу малых беларускіх банкаў (22-е месца па памеры актываў з 32 беларускіх банкаў) «Крэдэксбанк» ажыццяўляў вельмі вялікія, адносна ягонай капіталізацыі, па аб'ёмах аперацыі, якія, на думку Мінфіна ЗША, сведчаць аб адмыванні грошай ад імя падстаўных кампаній. Паводле інфармацыі Мінфіна ЗША, як мінімум з 2006 года гэты банк займаецца «вельмі сумнеўнымі фінансавымі аперацыямі, якія паказваюць на адмыванне грошай». У прыватнасці, сцвярджаецца, што ў перыяд са студзеня па сакавік 2010 года беларускі банк ажыццявіў плацяжы на $1 млрд на адрас падстаўных кампаній, зарэгістраваных у некалькіх юрысдыкцыях.

Мінфін прапаноўвае ўвесці працэдуру назірання за «Крэдэксбанкам» і да таго часу, пакуль не знікнуць сумневы ў яго добранадзейнасці, забараніць амерыканскім кампаніям і банкам весці з ім справы. Такое рашэнне амерыканскіх уладаў грунтуецца на частцы 311 Патрыятычнага Акту ЗША. Між тым, у дакуменце адзначаецца, што «Крэдэксбанк» не мае прамых карэспандэнцкіх адносінаў з ЗША.

Паводле Мінфіна ЗША, па адрасе юрыдычнай рэгістрацыі асноўнага акцыянера «Крэдэксбанк» - швейцарскай кампаніі Vicpart, зарэгістравана яшчэ каля 200 непразрыстых фірм.

«Крэдэксбанк» (да лютага 2007 года «Паўночны інвестыцыйны банк») быў заснаваны ў 2001 годзе на тэрыторыі вольнай эканамічнай зоны «Менск» швейцарскай кампаніі Vicpart Holding SA, якой належыць 98,82% акцый банка. Яшчэ адным акцыянерам банка з'яўляецца ЗТАА «Сэнтэкінвест» (1,18%). Бенефіцыярным уладальнікам «Крэдэксбанка» з'яўляецца Michel Haessig (Швейцарыя).

Статутны фонд «Крэдэксбанка» складае Br150, 4 млрд ($18,5 млн па бягучым курсе). На 1 красавіка 2012 года актывы банка склалі Br334, 9 млрд ($ 41.2 млн).