Беларусы забіраюць уклады з банкаў
49- 4.06.2012, 12:34
Шэраг буйных беларускіх банкаў канстатаваў адток тэрміновых рублёвых дэпазітаў насельніцтва ў апошні тыдзень мая.
Дадзеную тэндэнцыю агенцтву «Інтэрфакс-Захад» пацвердзілі ў некалькіх банках на ўмовах ананімнасці.
«На працягу апошняга тыдня мая адзначалася дастаткова актыўнае зняцце беларускіх рублёў з тэрміновых дэпазітаў, у асноўным гэта было непрацягненне раней заключаных дэпазітных дамоваў», - сказаў прадстаўнік аднаго з банкаў. Ён дадаў, што па выніках мая захаваўся прырост рублёвых дэпазітаў фізічных асоб, хоць ягоныя тэмпы значна замарудзіліся. Суразмоўца таксама адзначыў, што па выніках месяца павялічваецца доля капіталізацыі ў тэмпах агульнага прыросту ўкладаў.
Між тым, ён канстатаваў амаль прапарцыйны рост тэрміновых дэпазітаў фізічных асоб у замежнай валюце, у прыватнасці, у расейскіх рублях.
«Галоўнай прычынай сітуацыі, якая складваецца на дэпазітным рынку, з'яўляецца заканчэнне тэрміну дзеяння раней заключаных дэпазітных дамоваў на фоне зніжэння ставак па новых дэпазітах. У выніку частка ўкладчыкаў аддае перавагу фіксаванню прыбыткаў. На іхнія паводзіны таксама аказвае ўплыў набліжэнне адпускнога сезону, многія людзі аднавілі прыватнае будаўніцтва, разлікі за якое ў нас, як правіла, ажыццяўляюцца ў далярах», - растлумачыў прадстаўнік банка.
На ягоную думку, суму дэпазітаў насельніцтва, якая склалася ў банках на 1 чэрвеня, можна будзе лічыць адносна стабільнай на кароткатэрміновую перспектыву. «Частка найбольш спекулятыўна наладжаных укладчыкаў прагназуема сыходзіць з рублёвых дэпазітаў, астатнія наладжаныя на больш доўгатэрміновыя ўклады, хоць паніжэнне ставак працягнецца і далей», - мяркуе эксперт.
Між тым, адток рублёвых укладаў насельніцтва супаў з паслабленнем беларускага рубля ў канцы мая. Як паведамлялася, з 28 мая па 1 чэрвеня кошт кошыка валют вырас з Br2802,62 да Br2819,4, што адпавядае паслабленню беларускага рубля за тыдзень на 0,6%. Тым не менш, у цэлым за мінулы месяц беларускі рубель умацаваўся да кошыка валют на 1,6%. У параўнанні з 31 снежня 2011 года ўмацаванне нацвалюты склала 1,66%.
У сувязі з паслабленнем беларускага рубля, у прыватнасці, да даляра ЗША, беларускія банкі адзначалі мацнейшы попыт насельніцтва на замежную валюту, што выклікала неабходнасць падмацавання пунктаў абмену валют за кошт набыцця СКВ на біржы.