У Афганістане разбіўся верталёт з беларускім экіпажам
14- 11.07.2012, 8:57
Верталёт Мі-8МТВ з расейска-беларускім экіпажам пацярпеў крушэнне ў Афганістане.
Як паведамляе «Інтэрфакс» са спасылкай на крыніцу ў авіятранспартнай галіне, інцыдэнт адбыўся яшчэ на мінулым тыдні. Аднак вядома аб ім стала толькі ў аўторак.
Паводле слоў крыніцы, пры пасадцы ў 60 кіламетрах ад Кандагара верталёт закрануў агароджу і паваліўся з вышыні ў некалькі метраў. У выніку загінуў бортмеханік - грамадзянін Расеі, які пры ўдары выпаў з верталёта. Камандзір паветранага судна (грамадзянін Беларусі) і другі пілот (расеец) былі дастаўлены ў клініку Кабула, а затым перавезены ў апёкавы цэнтр у Краснадары.
Гэтую інфармацыю пацвердзіў Андрэй Казлоўскі, генеральны дырэктар ААТ НВК «ПАНХ», супрацоўнікамі якога з'яўляліся члены экіпажа Мі-8.
Верталёт быў зарэгістраваны ў Гвінеі. Ён дастаўляў ваду для амерыканскай ваеннай базы, размешчанай пад Кандагарам.