Праезд у электрычках падаражэў на 20%

Тарыфы на перавозкі пасажыраў мясцовымі і прыгараднымі цягнікамі ў Беларусі з сённяшняга дня павышаюцца на 20%.

Аб гэтым паведамілі карэспандэнту БелТА ў аддзеле сувязяў з грамадскасцю Міністэрства эканомікі.

Гэта прадугледжана пастановай Мінэканомікі № 59 ад 21 чэрвеня 2012 года.

Дзеючыя тарыфы на перавозкі пасажыраў мясцовымі цягнікамі не пераглядаліся з лістапада 2010 года, прыгараднымі цягнікамі - з красавіка 2011 года, прыгараднымі электрацягнікамі, сфарміраванымі з вагонаў палепшаных характарыстык, - з верасня 2011 года, распавялі ў Мінэканомікі.

Стрымліванне тарыфаў на перавозкі пасажыраў чыгуначным транспартам агульнага карыстання ва ўнутрырэспубліканскіх зносінах ва ўмовах рэзкага росту выдаткаў на іх ажыццяўленне, абумоўленага дэвальвацыяй беларускага рубля, прывяло да таго, што ўзровень акупляльнасці перавозак знізіўся да 9,5-9,8%.

Для скарачэння стратнасці перавозак пасажыраў чыгуначным транспартам агульнага карыстання ва ўнутрырэспубліканскіх зносінах, змяньшэння розніцы ў кошце праезду аўтамабільным і чыгуначным транспартам, прымаючы да ўвагі павышэнне даходаў насельніцтва, Міністэрства эканомікі, разгледзеўшы прапановы Мінтранса і Беларускай чыгункі, прыняло пастанову № 59 «Аб унясенні змяненняў у пастанову Міністэрства эканомікі Рэспублікі Беларусь ад 4 красавіка 2012 г. № 25».

Згодна з пастановай, тарыфы на перавозкі пасажыраў мясцовымі і прыгараднымі цягнікамі павышаны на 20%. Пры гэтым зонны тарыф за праезд у прыгарадных цягніках павялічыўся з Br500 да Br600, тарыф за адзін кіламетр праезду - з Br50 да Br60.

Для скарачэння розніцы ў кошце праезду маршрутнымі таксі і прыгарадныя электрацягнікі, сфарміраваныя з вагонаў палепшаных характарыстык (электрацягніка швейцарскай кампаніі Stadler), тарыфы на перавозкі пасажыраў у названых цягніках па маршрутах Менск - Ждановічы; Менск - станцыя Беларусь, Менск - Гарадзішча і іншых павышаюцца з Br2 тыс. да Br3 тыс., па маршрутах Менск - Смалявічы, Менск - Рудзенск і іншым - з Br3 тыс. да Br4 тыс.

У адпаведнасці з указам ад 25 лютага 2011 года № 72 «Аб некаторых пытаннях рэгулявання цэн (тарыфаў) у Рэспубліке Беларусь» тарыфы на перавозкі пасажыраў і багажу чыгуначным транспартам агульнага карыстання ва ўнутрырэспубліканскіх зносінах рэгулююцца Міністэрствам эканомікі.