Кошты ў беларускіх санаторыях палохаюць нават расейцаў

Попыт на паслугі беларускіх санаторыяў знізіўся, прычым пераважна з боку расейскіх турыстаў.

Аб гэтым паведаміла карэспандэнту БелТА загадчык аддзела турызму ТАА «Ладэ» Наталля Макей.

Калі ў апошнія гады менавіта расейцы стваралі ажыятажны попыт на паслугі беларускіх санаторыяў, то ў гэтым годзе цікавасць да нашых здраўніц з іх боку аслабела. Перш за ўсё, гэта звязана з бягучым ростам коштаў на паслугі беларускіх санаторыяў. «У цяперашні час такога попыту сярод расейскіх турыстаў, як гэта было ў мінулым годзе, ужо няма», - адзначыла загадчык аддзела турызму.

Акрамя таго, сваю ролю адыграла паслабленне расейскага рубля ў адносінах да сусветных валют. Эксперт знаходзіць гэтую тэндэнцыю часовай і ўжо ў наступным годзе чакае ўзмацненне цікавасці з боку расейцаў да адпачынку ў беларускіх здраўніцах.

Падзенне попыту з боку расейскіх турыстаў адаб'ецца на беларускіх санаторыях толькі восенню. Пакуль жа беларускія здраўніцы запоўненыя цалкам, а попыт традыцыйна для летняга сезону перавышае прапанову. «Падзенне попыту на паслугі санаторыяў адбудзецца толькі восенню. Загрузка санаторыяў можа знізіцца ў сярэднім на 30%», - лічыць суразмоўніца.

Беларускія турысты ад гэтага павінны толькі выйграць: па-першае, стане прасцей забраніраваць месца, па-другое - шматлікія санаторыі, верагодна, вырашацца на сезонныя зніжкі. Увесну многія беларускія санаторыі ўжо зрабілі патуранне для беларусаў, прадаючы да канца красавіка пуцёўкі толькі грамадзянам Беларусі. «Гэта было зроблена для таго, каб даць магчымасць адпачыць у санаторыях беларусам», - патлумачыла Наталля Макей.

Разам з тым многія турысты пераключаюць свой позірк з санаторыяў на больш даступныя па кошту пансіянаты, у якіх адсутнасць медыцынскіх паслуг кампенсуюць прыемнымі дробязямі: магчымасцю прайсціся па экалагічнай сцежцы, схадзіць у лазню, парыбачыць, пакарміць жывёл у вальерах, паплаваць на лодцы.