За смецце на пляжы - забарона на купанне

Дзіўны адказ на свой зварот да брэсцкіх улад атрымалі мясцовыя актывісты.

Яны заклікалі гарвыканкам правесці добраўпарадкаванне зоны адпачынку ў раёне Чырвонага двара ў абласным цэнтры.

Як паведаміў charter97.org адзін з ініцыятараў звароту Ігар Маслоўскі, падставай стаў неналежны стан тэрыторыі лесапаркавай паласы і берага вадаёма каля ракі Каменка. У прыватнасці, у звароце згадвалася, што «з-за масавага скіду смецця і харчовых адходаў берагі вадаёма і лясны масіў ператвораныя ў вялізную звалку, што спрыяе ўзнікненню небяспечных для здароўя людзей ачагоў распаўсюду інфекцый». У дакуменце звярталася ўвага на тое, што адна з прычын дадзенай сітуацыі - адсутнасць месцаў для збору смецця.

Сваімі сіламі актывісты ўжо праводзілі мерапрыемствы па прыбіранні акваторыі гэтага вадаёма, яго ўзбярэжжа і прылеглага ляснога масіву. Усё сабранае смецце тады было вывезена ўдзельнікамі акцыі на ўласным аўтатранспарце на бліжэйшыя гарадскія смеццязборнікі. Аднак, каб на тэрыторыі пастаянна падтрымліваўся парадак, трэба ўмяшанне ўлад. Хоць для рашэння паднятай праблемы не трэба вялікіх грошай, затое яна прынясе вялікую карысць навакольнаму асяроддзю.

З адказу, атрыманага Ігарам Маслоўскім ад брэсцкіх улад, вынікае, што забруджванне прылеглай да вадаёма тэрыторыі адбываецца з-за таго, што грамадзяне, якія прыязджаюць на адпачынак, ігнаруюць уведзеную забарону на купанне. Далей у лісце, падпісаным намеснікам старшыні гарвыканкама Васілём Кавальчуком, што ВКУП «Камунальнік» было даручана да 1 траўня г.г. устанавіць кантэйнеры для збору цвёрдых бытавых адходаў, а таксама праводзіць перыядычнае санітарнае прыбіранне прыбярэжных зон.

«Парадаксальным выглядае факт такога даручэння, якое патрабуе навесці парадак яшчэ ў траўні, - распавядае Ігар Маслоўскі. - Свой зварот мы накіроўвалі 4 ліпеня, таму з атрыманага адказу вынікае, што гарвыканкам не кантралюе сітуацыю, а ВКУП «Камунальнік» не выконвае рашэнні. Акрамя таго, мы так і не атрымалі адказ на галоўнае пытанне: ці ўстаноўлены ў гэтай зоне адпачынку смеццевыя бакі?»

Што датычыцца забароны на купанне, то, паводле слоў Маслоўскага, можа скласціся ўражанне, што менавіта актывісты прасілі гарвыканкам прыняць такія меры, хоць у звароце размова ішла аб навядзенні элементарнага парадку.