Брэсцкі УУС прапануе павысіць ліміт хуткасці на М1 да 140 км/г

УУС Брэсцкага аблвыканкама ініцыюе павелічэнне хуткаснага рэжыму для легкавога транспарту на асобных участках трасы М1/Е30 да 140 км/гадзіну.

Аб гэтым сёння на прэс-канферэнцыі паведаміў начальнік УУС Брэсцкага аблвыканкама Уладзімір Сычэўскі, перадае карэспандэнт БелТА.

З адпаведным хадайніцтвам УУС Брэсцкага аблвыканкама звярнулася ў МУС. Паводле слоў Уладзіміра Сычэўскага, перад тым, як выступіць з гэтай ініцыятывай, дадзенае пытанне было вывучана ў рэгіёне. Разглядаліся шматлікія звароты людзей, якім па родзе сваёй дзейнасці даводзіцца шмат ездзіць, аналізавалася дарожная сітуацыя.

«Аналіз аварыйнасці на трасе М1/Е30 паказвае, што асноўнай прычынай гібелі людзей з'яўляецца не хуткасны рэжым. Кіроўцы ў большасці сваёй ўсё ж такі выбіраюць хуткасць у адпаведнасці з вопытам, умовамі надвор'я. Большай праблемай з'яўляецца тое, калі вадзіцелі засыпаюць за рулём. І такія выпадкі, улічваючы міжнароднае значэнне трасы, тут не рэдкасць», - адзначыў Уладзімір Сычэўскі.

«Што датычыцца дарожнага палатна, то па якасці траса М1/Е30 не саступае еўрапейскім аўтабанам. Аднак гэта ўсё ж не аўтабан: да трасы прылягаюць населеныя пункты, не ў поўнай меры адпавядаюць крытэрам аўтабанаў транспартныя развязкі. Таму размова не ідзе аб павышэнні хуткаснага рэжыму на ўсёй працягласці, а аб асобных яе участках, дзе сёння максімальная хуткасць руху легкавога транспарту абмяжоўваецца 120 км/г», - растлумачыў Уладзімір Сычэўскі.

Што датычыцца вадзіцеляў, то стымулам не перавышаць хуткасны рэжым для іх павінны служыць усталяваныя на трасе відэафіксатары хуткасці. І інфармацыя пра гэта павінна быць даступнай для кіроўцаў, лічаць ва УУС.

Паводле слоў Уладзіміра Сычэўскага, са свайго боку ва УУС бачаць неабходнасць змяняць фармат працы на трасе М1/Е30 супрацоўнікаў ДАІ, робячы большы акцэнт на прафілактыцы ДТЗ. «Ужо сёння свае нарады мы наблізілі да месцаў адпачынку аўтамабілістаў. Нацэльваем нашых інспектараў на тое, каб яны карэктна цікавіліся ў кіроўцаў, як доўга яны ў дарозе, рэкамендавалі адпачынак, і калі гэта не прыпынак для сну, то, па меншай меры, прыпынак для таго, каб трохі прагуляцца, выпіць чай ці каву», - адзначыў ён.