У казіно - таксама па пашпартах

У Беларусі плануецца прадугледзець абавязковы кантроль асоб, якія наведваюць гульнявыя ўстановы, на падставе дакументаў, якія сведчаць асобу.

Такое патрабаванне змяшчаецца ў распрацаваным праекце ўказа кіраўніка дзяржавы, паведаміў сёння журналістам старшыня галоўнага ўпраўлення падаткаабкладання падакцызных тавараў, гульнявога бізнесу і электронных сістэм кантролю рэалізацыі тавараў Міністэрства па падатках і зборах Уладзімір Муквіч, перадае карэспандэнт БелТА.

Праект указа прадугледжвае ўзмацненне абароны грамадзян ад негатыўных з'яў, перш за ўсё, ад з'яўлення людзей, залежных ад азартных гульняў. Каб мінімізаваць негатыўныя сацыяльныя наступствы ад гульнявога бізнэсу, плануецца ўвесці абавязковы кантроль на падставе дакументаў, якія сведчаць асобу.

Акрамя таго, аўтары дакумента прапануюць увесці механізм самаабмежавання. Гэта значыць чалавек, які пакутуе ад гульнявой залежнасці, зможа напісаць заяву з просьбай абмежаваць яму доступ у казіно і залы гульнявых аўтаматаў тэрмінам ад 6 месяцаў да 3 гадоў.

Як адзначыў начальнік галоўнага ўпраўлення, праект указа ужо прайшоў узгадненне.

Магчымасць абмежаваць доступ у гульнявыя ўстановы сацыяльна неабароненым пластам насельніцтва і асобам, якія пакутуюць ад гульнявой залежнасці, разглядалася яшчэ ў 2010 годзе. Планавалася распрацаваць модуль абароны чалавека, які гуляе, а таксама ўсталяваць ліміт або пройгрышу, альбо часу гульні. Таксама пры казіно хацелі адкрыць службы сацыяльнай абароны, каб за аматарамі гульнявых аўтаматаў прыглядаў спецыяльна наняты псіхолаг, а ў выпадку неабходнасці «пацярпелым» аказвалі медыцынскую дапамогу.