Актывістка патрабуе кампенсацыі за жудасныя ўмовы на Акрэсціна

Затрыманая 24 сакавіка ў Доме культуры МТЗ Алена Дубовік звярнулася ў суд з пазовам да ГУУС Менгарвыканкама, каб кампенсаваць маральную шкоду падчас яе знаходжання на Акрэсціна.

Яе затрымалі падчас канцэрту 24 сакавіка і пакаралі адміністрацыйным арыштам на трое сутак за дробнае хуліганства (арт. 17.1 КаАП РБ). Прычым, падчас суда высветлілася, што дзяўчыне былі нанесеныя цялесныя пашкоджанні пры затрыманні. Аднак суд не звярнуў на гэта ўвагі, піша ПЦ «Вясна».

13 жніўня ў судзе Маскоўскага раёна адбылося першае пасяджэнне па пазове Дубовік. Справу разглядала суддзя Алена Рудніцкая.

Аднак цяжка зразумець логіку суддзі, якая наступнае судовае пасяджэнне прызначыла ажно на 1 кастрычніка. Ці гэта справа сапраўды патрабуе такіх значных намаганняў?

Пакаранне дзяўчына адбывала ў Цэнтры ізаляцыі правапарушальнікаў ГУУС Менгарвыканкама на Акрэсціна. Умовы ўтрымання яна апісвае ў сваім пазове ў суд Маскоўскага раёна: «Мяне змясцілі ў камеру, дзе было 8 чалавек. Норма плошчы на аднаго чалавека была парушаная. Спальных месцаў абсталявана не было. Пасцельную бялізну і матрац мне не выдавалі. Туалеты ў камерах ЦІП знаходзяцца ў паўметры ад спальнага месца і «адгароджаныя» ад спальнага месца толькі адной перагародкай. У камерах недастаткова натуральнага асвятлення. Кругласутачна ўключана штучнае асвятленне, але яго не хапае, у камеры паўзмрок. Чытаць можна толькі з вялікімі намаганнямі і непрацяглы час, так хутка стамляюцца вочы. У камеры вельмі холадна, так як не зачыняецца брамка, яе ўшчыльняюць падручнымі сродкамі - газетамі. У той жа час у камеры душна, бо практычна ўсе, акрамя мяне, палілі. У камерах не было пітной вады. Пры паступленні мне далі кавалачак мыла і некалькі лістоў газеты замест туалетнай паперы. У камеры вадзіліся пацукі. Некаторыя з арыштаваных у камеры былі ў крайняй ступені неахайныя, але адміністрацыя не прымала мер для таго, каб правесці ім хоць бы элементарную санапрацоўку. За трое сутак знаходжання на Акрэсціна мяне ні разу не вадзілі на шпацыр».

ГУУС Менгарвыканкама ў ходзе праверкі было ўстаноўлена, што ўтрыманне Алены Дубовік у ЦІП суправаджалася парушэннямі яе праў. Таму дзяўчына і звярнулася ў суд з патрабаваннямі спагнаць з ГУУС Менгарвыканкама кампенсацыю за маральную шкоду, а таксама забараніць эксплуатацыю ЦІП на Акрэсціна, дзе масава парушаюцца правы грамадзян Беларусі.