БРСМ заклікае моладзь у аграгарадкі

Праблема працаўладкавання маладых спецыялістаў у сельскай мясцовасці ўжо не адзін год турбуе мясцовыя ўлады.

Не сакрэт, што доўга нядаўні выпускнік ВНУ па месцы размеркавання не затрымліваецца, асабліва калі яно знаходзіцца не ў сталіцы ці хоць бы абласным цэнтры. Самы просты і дзейсны спосаб стымуляваць маладых работнікаў заставацца ў сельскай мясцовасці - гэта прадастаўляць годную аплату працы і жыллёвыя ўмовы, піша onliner.by.

Аднак у БРСМ лічаць, што нематэрыяльным стымуляваннем можна дамагчыся не меншага. Штогод з 2008-га праходзіць конкурс «Уладар сяла», які, па словах арганізатараў, накіраваны «на замацаванне маладых сем'яў на сяле, узняцце прэстыжу сельскагаспадарчых прафесій і ўмацаванне сямейных традыцый».

Больш таго, у гэтым годзе праект «Уладар сяла» уключаны ў праграму правядзення рэспубліканскага фестывалю-кірмашу «Дажынкі-2012», які праводзіцца ў горадзе Горкі і Горацкім раёне Магілёўскай вобласці.

Удзельнікамі конкурсу могуць стаць «маладыя сем'і, муж і жонка ва ўзросце да 31 года, якія маюць аднаго і больш дзяцей, вядуць прысядзібную гаспадарку на высокім гаспадарчым узроўні, працуюць на прадпрыемствах, у арганізацыях, установах розных форм уласнасці».

Якія ж вынікі гэтага мерапрыемства? Нягледзячы на тытанічныя намаганні па павышэнню прэстыжу сельскагаспадарчых прафесій, жадання застацца ў сельскай мясцовасці ў маладых спецыялістаў год ад года не дадаецца. А статыстыка канстатуе адток насельніцтва, асабліва самага актыўнага ва ўзросце 22-28 гадоў, у сталіцу і абласныя цэнтры Беларусі. Магчыма, што немалыя сродкі, затрачаныя на такога роду конкурсы, варта было б выдаткаваць на паляпшэнне матэрыяльнага становішча маладых спецыялістаў.