Партыя «МММ» Маўродзі прыме ўдзел ва ўкраінскіх выбарах

Заснавальнік фінансавай піраміды МММ Сяргей Маўродзі абвясціў аб стварэнні палітычнай партыі «МММ», якая будзе прымаць удзел у будучых парламенцкіх выбарах на Украіне.

«Прыйшоў час узмацняць ідэалагічную працу, паколькі не ўсе разумеюць мэты, да якіх мы ідзём. А мы змяняем свет! Таму я аб'яўляю аб пачатку грамадска-палітычнай работы ў нашай сістэме. Ва Украіне створана палітычная партыя «МММ» і мы будзем вылучаць яе на бліжэйшыя выбары ў Вярхоўную Раду Украіны», - сказаў ён у сваім відэазвароце, размешчаным у Інтэрнэце.

На яго думку, удзел такой партыі ў выбарах падыме «баявы дух» удзельнікаў руху і дазволіць правесці магутную рэкламную кампанію па ўсёй Украіне, піша «Інтэрфакс».

Як паведамлялася, 16 чэрвеня С.Маўродзі заявіў аб закрыцці МММ-2011. Ён заявіў аб адмене «рэжыму спакою», які ўводзіўся для спынення панікі сярод укладчыкаў.

Як заявіў С.Маўродзі, усе сродкі МММ-2011 будуць пушчаныя на выплаты ўдзельнікам па формуле «намінал плюс 10% мінус ўжо атрыманае». Пры гэтым пачнуцца выплаты з укладаў да 10 тыс. рублёў. «Аднак на ўсіх грошай, зразумела, не хопіць. Піраміда! Абавязкаў заўсёды больш, чым рэсурсаў. Адсутныя сродкі будзем забіраць з МММ-2012», - заявіў С.Маўродзі.

Паводле яго ацэнкі, з усімі расплаціцца атрымаецца за два-тры месяцы. «Тым больш, што МММ-2012 развіваецца надзвычай хутка. Адпаведна, і струмень уліванняў адтуль павінен хутка расці», - сказаў стваральнік піраміды.