У М'янме адмянілі цэнзуру ў СМІ

Пра гэта аб'явіла міністэрства інфармацыі краіны.

Дэпартамент кантролю і рэгістрацыі прэсы заявіў, што, пачынаючы з панядзелка, журналісты не павінны даваць свае артыкулы перад публікацыяй на адабрэнне дзяржаўных цэнзараў, перадае ВВС.

На працягу доўгага часу ўрад М'янмы жорстка кантраляваў усе аспекты, звязаныя з дзейнасцю сродкаў масавай інфармацыі.

Аднак грамадзянскі ўрад, які ўзначаліў краіну ў 2011 годзе, паступова здымае абмежаванні, накладзеныя ваенным рэжымам.

Журналісты ўжо атрымалі ўказанні, якія дазваляюць ім пісаць на спрэчныя сацыяльныя і палітычныя тэмы. Гэта было б немагчыма пры ваенным Дзяржаўным савеце міру і развіцця, які кіраваў краінай з 1988 года.

Раней дазвол публікавацца без папярэдняй цэнзуры быў дадзены прыкладна 300 газетам і часопісам, якія асвятлялі менш далікатныя пытанні. Аднак з гэтага часу цэнзура будзе адменена ва ўсіх сродках масавай інфармацыі.

У верасні мінулага года былі зняты абмежаванні на доступ да 30 тысяч сайтаў. Такім чынам карыстальнікі ўпершыню атрымалі неабмежаваны доступ да сайтаў з палітычным зместам.

«Цэнзура пачалася 6 жніўня 1964 і скончылася праз 48 гадоў і два тыдні», - паведаміў у панядзелак кіраўнік дэпартамента кантролю і рэгістрацыі прэсы Цін Шве.

Аднак прадстаўнік міністэрства паведаміў агенцтву, што фільмы па-ранейшаму будуць падвяргацца цэнзуры.

AFP прыводзіць словы неназванага рэдактара часопіса ў Янгоне, які сказаў: «Гэта вялікі дзень для ўсіх журналістаў у М'янме, якія працавалі ва ўмовах гэтых адыёзных абмежаванняў на працягу занадта многіх гадоў».

Аднак некаторыя журналісты выказалі боязь, што іх могуць заклікаць да адказнасці па закону, калі ўлады знойдуць нагоду прычапіцца да апублікаваных артыкулаў.