«Палатачнік» Глаз патрабуе закрыць усе гімназіі і ліцэі

«Дэпутат» лічыць, што гімназіі і ліцэі нібыта супярэчаць прынцыпам палітыкі дзяржавы.

Намеснік старшыні пастаяннай камісіі «палаты прадстаўнікоў» па правах чалавека, нацыянальных адносінах і сродках масавай інфармацыі Анатоль Глаз 30 жніўня на прэс-канферэнцыі ў Менску выказаў меркаванне, што ў Беларусі трэба скасаваць гімназіі і агульнаадукацыйныя ліцэі, піша БелаПАН.

Паводле яго слоў, сёння гэтыя ўстановы адукацыі «увайшлі ў моду». На навучанне гімназіста вылучаецца на 35% больш сродкаў, чым на школьніка, аднак вынікі гімназій на алімпіядах ніжэй чаканых. Акрамя таго, існаванне гімназій і агульнаадукацыйных ліцэяў стварае «рэзкае расслаенне» узроўню агульнай сярэдняй адукацыі ў краіне: у гэтых установах канцэнтруюцца лепшыя вучні і настаўнікі. «Гэта значыць, мы ідзем па шляху «захаднізацыі» школы, рэзкага расслаення, палярызацыі, а з пункту гледжання палітыкі нашай дзяржавы гэта няправільна. Мы павінны прапаведаваць прынцыпы савецкай школы», - сказаў Глаз.

Ён таксама лічыць недапушчальным правядзенне экзаменаў у гімназіі для выпускнікоў чацвёртых класаў. Арганізм ў дзяцей яшчэ не сфармаваны, і экзамены для іх - залішняя нагрузка.

Старшыня пастаяннай камісіі «палаты прадстаўнікоў» па адукацыі, культуры, навуцы і навукова-тэхнічным прагрэсе Уладзімір Здановіч заявіў, што ў цяперашні час у гімназіі «пачала перамяшчацца праблема карупцыі»: кожны бацька спрабуе туды аддаць сваё дзіця, нават з іншага мікрараёна. Як вынік, у гімназіі сталі прымаць дзяцей з досыць пасрэднымі здольнасцямі і нават з адсутнасцю жадання вучыцца.

«Калі ўжо ствараць ідэальна роўныя ўмовы для дзяцей у Беларусі, то ад гімназій трэба адмовіцца, - лічыць Здановіч. - А калі падбіраецца чалавек 10-15, якія жадаюць навучацца на больш высокім узроўні, і ёсць настаўнікі, якія могуць працаваць на гэтым узроўні, стварайце ўнутры школы гімназічныя класы».