У Менску гарэла СТА на вуліцы Гурскага (Фота)
6- 9.08.2012, 9:44
Учора днём у сталічным мікрараёне Міхалова можна было бачыць слуп дыму.
Яго крыніца - станцыя тэхабслугоўвання, размешчаная па адрасе вул. Гурскага, 30а. Паведамленне аб узгаранні паступіла на спецлінію МНС каля 15:50. Чалавек, які тэлефанаваў сцвярджаў, што пажар адбыўся ў фарбавальнай камеры. Праз сем хвілін ратавальнікі ўжо былі на месцы здарэння, паведамляе onliner.
«Назіраўся дым сярэдняй канцэнтрацыі, які выходзіў з-пад даху будынка, - распавялі ў МНС. - Было ўстаноўлена, што адбылося загаранне тэхнічных вадкасцей (растваральнік, адпрацаваны алей, фарба). Пасля агонь распаўсюдзіўся на дах будынка, прызначанага для работ па фарбаванні аўтамабіляў».
Памяшканне размешчана ў асобным будынку на тэрыторыі ТАА «Цэйс-Сэрвіс». Праз 20 хвілін пасля паступлення паведамлення пажар быў лакалізаваны, а крыху пазней - ліквідаваны. У выніку ўзгарання былі пашкоджаныя ёмістасці з тэхнічнымі вадкасцямі, дах на плошчы 50 кв. м, закураны сцены памяшкання.
Прычыну пажару ўстановяць эксперты.