На Дзяніса Дашкевіча нацкавалі падатковую
9- 10.09.2012, 13:36
Няўдалага кандыдата ў дэпутаты выклікалі спачатку ў КДБ, а потым у падатковую.
Актывіста кампаніі «Гавары праўду» Дзяніса Дашкевіча, якому было адмоўлена ў рэгістрацыі кандыдатам у «дэпутаты» па Рагачоўскай выбарчай акрузе, выклікаюць у раённую падатковую інспекцыю, паведамляе ПЦ "Вясна".
«Мне патэлефанавалі на хатні нумар і запрасілі прыйсці ў інспекцыю для апытання з пашпартам, але я адмовіўся гэта зрабіць без павесткі. Павестку даслалі на наступны дзень. У ёй сказана, што 10 верасня ў 11 гадзін я павінен прыйсці ў падатковую інспекцыю для правядзення апытання. Па тэлефоне, дарэчы, мне патлумачылі, што апытанне будзе праводзіцца на аснове дакумента з маімі паказаннямі, якія былі дадзены ў КДБ», - распавёў актывіст.
Нагадаем, 23 жніўня, на наступны дзень пасля адмовы ў рэгістрацыі кандыдатам у «дэпутаты», Дзяніса Дашкевіча выклікалі ў мясцовы аддзел КДБ. Там Дашкевічу далі зразумець, што ў яго могуць узнікнуць праблемы з падаткамі, бо раней Дашкевіч нібыта незаконна атрымліваў грошы за сваю прадпрымальніцкую дзейнасць (Дашкевіч праводзіў вяселлі ў Рагачове). Сам Дашкевіч звязвае свой выклік у падатковую інспекцыю са сваёй грамадскай дзейнасцю і сталым супрацьстаяннем з мясцовымі ўладамі.